Khua git gai Ping gah dêh čar ơi Tô Lâm pơpŭ hơdôm tơlơi dưi prong prin, djop mơta dêh čar Khač dưi ngă tơdơi kơ Jơnum tal XX truh ră anai; pơsit tong Việt Nam lêng kơ lăng bruă pơđĭ kyar tơlơi rô nao rai hăng dêh čar Khač lĕ tơlơi rơkâo sit nik, tơlơi ruah lăp djơ̆, prong hloh amăng hơdră bruă pơtom hiăp rơngai, ngă pô, djop bơnah, djop mơta mơng Việt Nam. Lăi pơtong Quảng Tây lĕ ƀon lan pơlir hơbit kjăp hăng Việt Nam, Khua git gai Ping gah dêh čar lăng yôm tơlơi gơgrong, ba jơlan hlâo mơng Quảng Tây amăng pơtrut tơlơi rô nao rai giang mah, ngă hrŏm sit nik hăng Việt Nam.

Kơ bruă ngă hrŏm pơ anăp, Khua git gai Ping gah rơkâo Quảng Tây hăng hơdôm boh ƀon lan ƀơi Việt Nam kiăo tui tơlơi črâo ba mơng khua mua, kơtưn pơbưp nao rai, thâo hluh tơdruă; pok pơhai tŭ yua ngă hrŏm ba glăi tơlơi dưi amăng djop mơta bruă, sit biă ñu lĕ amăng bơwih ƀong huă-sĭ mơdrô, anih anom, boh thâo măi mok, pơplih pơčeh phrâo, boh thâo ia rơgơi (AI)…