Tui hăng tơlơi lăi pơthâo glăi, thun 2024, abih bang gơnam GRDP mơ̆ng tơring čar Nam Định đĭ năng ai ñu 10% (dăp tal 9 đơ đam dêh čar). Pơhrui ngăn drăp kơnuk kơna hmâo 14.828 klai prăk, đĭ 42% bơhmu hăng thun 2023. Pơhiăp amăng mông mă bruă, Khua git gai Ping gah dêh čar ơi Tô Lâm rơkâo tơring čar Nam Định khom pơphun ngă tui ba glăi bôh tơhnal dong hơdôm tơlơi črâo ba, tơlơi pơtrun pơsit mơ̆ng dêh čar.

Rơđah biă ñu lĕ pok pơhai khut khăt Tơlơi črâo ba mrô 35 mơ̆ng Ding jum kơđi čar kơ Jơnum Ping gah hơdôm gưl  anăp nao Jơnum Ping gah đơ đam dêh čar tal 14, anai lĕ bruă mă yôm phăn phun amăng thun anai. Ngă tui dong Tơlơi pơtrun pơsit mrô 18 mơ̆ng Ping gah dêh čar kơ dưm dăp ngă rơbô̆t bruă kơđi čar tŭ yua ba glăi bôh tơhnal, hrưn đĭ amăng blan 2 giong pioh pơphun bruă Jơnum; pran jua lĕ rơguăt samơ̆ khom djru ba glăi bôh tơhnal hơdôm gưl mơnuih ƀôn sang. Ƀrô djơ̆ tal prăp lui čơkă Tết tui phiăn juăt Ất Tỵ 2025, Khua git gai Ping gah dêh čar hơ-ưč hmưi Ping gah, gong gai hăng mơnuih ƀôn sang tơring čar Nam Định ngă tui kơtang dong phiăn juăt ngă hơkrŭ ngă truh kih hơdôm tơhnal pơkă, bruă jao hmâo ba tơbiă./.