Khua git gai pơpŭ bơni kơ tơlơi gir run, boh than mơ̆ Ping gah, Gong gai hăng Mơnuih ƀôn sang tơring čar Hưng Yên hơmâo ngă amăng thun blan rơgao, biă ñu amăng thun 2024, jing pơtrut tơring čar Hưng Yên hrŏm hăng dêh čar ta kơjăp tơkai yak amăng “Rơnuk thun phrâo - Thun blan hrưn đĭ mơ̆ng djuai ania Việt Nam”.

Khua git gai Ping gah lăi, thun 2025, Ping gah tơring čar Hưng Yên kiăng thâo pơmin djơ̆, pơmin dlăm hloh kơ djŏp bruă; pơsit tơlơi gêh gal, tơlơi hơmâo mơ̆ng tơring čar, mơ̆ng anun čih rơđah bruă hơget kiăng ngă, ruah bruă kiăng ngă hlâo, bruă yôm phun či pơƀut git gai črâo bruă, hơmâo tơlơi pơplih phrâo kơjăp kơtang hloh amăng bruă pơđĭ kyar bơwih ƀong huă - mơnuih mơnam, akŏ pơdong Ping gah hăng anom bruă kơđi čar mă bruă klă, kơtang, dăp glăi anom bruă čar gưl tơring čar, tơring glông mă bruă “hơdeč hmar - kơtang - rơgơi - tŭ yua”, djơ̆ hăng tơlơi pơtrun mơ̆ng Ping gah, djơ̆ hăng tơlơi kiăng mơ̆ng tơring čar; lăng ba pơsir bruă kơnuk kơna kiăng djru, ngă klă bruă pơtô tơlơi pơmin hăng ƀing khua mua, mơnuih mă bruă.