Khua git gai Ping gah lăi, Việt Nam leng kơ lăng yom tơlơi rô nao rai klă hiam hăng Nga, amăng anun ngă hrŏm pơtô hăng pơjuăt jing gong tơmeh yom phun, kiăng hơmâo mơnuih mă bruă rơgơi hloh, bơwih brơi bruă akŏ pơdong hăng pơgang lŏn ia tui rơnuk phrâo.

Khua git gai Ping gah lăng yom biă hơdôm jơlan hơdră ngă hrŏm plah wah Sang hră Kơđi čar dêh čar djă anăn Hồ Chí Minh hăng Sang hră Hrăm bruă ngă hră pơ-ar Khua mir sir dêh čar Nga hrơi blan rơgao; đăo kơnang tal čuă jơmư hăng ngă bruă mơ̆ng Grup khua mua pơtrut tui dong tơlơi rô nao rai plah wah dua boh Sang hră hăng hơdôm anom apăn bruă dua bơnah, laih dong pok rai lu tơlơi pơplih klă hloh amăng bruă pơtô pơjuăt, pơtô ƀing khua, kơsem min boh thâo rơgơi hloh hăng ngă hrŏm lu mơta bruă. Pơsit Ping gah hăng Kơnuk kơna Việt Nam leng kơ ngă găl brơi či pok prong ngă hrŏm plah wah hơdôm sang hră pơtô pơjuăt, kơsem min boh thâo amăng bruă boh thâo ia rơgơi yom, pơčeh phrâo, mă yua boh thâo mrô hăng hơdôm bruă phrâo hơmâo, Khua git gai Ping gah ơi Tô Lâm kiăng dua Sang hră pơtrut tui hơdôm tơlơi hơmâo ngă; pok prong ngă hrŏm pơtô pơjuăt kơ wai lăng bruă kơnuk kơna, tơlơi pơtô djơ̆ bruă kơđi čar, pơplih bruă ngă hră pơ-ar, wai lăng bruă yom phun, mă yua boh thâo mrô amăng plang ngă bruă čar, hăng tơlơi rơgơi ngă khua gưl prong. Laih dong, pơtrut jơnum bơbưp ƀing nai pơtô, ƀing kơsem min boh thâo, čơđai sang hră; pơphun hơdôm mông jơnum boh thâo kiăng kah pơpha tơlơi thâo thăi akŏ pơdong Kơnuk kơna kiăo tui tơlơi phiăn, wai lăng lŏn ia tui rơnuk phrâo hăng wai lăng pơđĭ kyar dêh čar.