Ƀrô hrơi Tê̆t ngă yang thun phrâo Ất Tỵ 2025 giăm truh, laih anun anăp nao ngă lơphet 95 thun hrơi akŏ pơdong Ping gah Cộng sản Việt Nam, mơguah lơ 16/1 ƀơi Nam Định, Khua git gai Ping gah ơi Tô Lâm ba jơlan khua mua Ping gah glăi tŭi ñang, dưm bơnga hơdor kơ Khua git gai Ping gah hơđăp rơgŏm ơi Trường Chinh ƀơi Gong kut hăng Sang pioh gơnam Khua git gai Ping gah Trường Chinh. Khua git gai Ping gah rơgŏm ơi Trường Chinh anăn sit ñu lĕ Đặng Xuân Khu, tơkeng lơ 9/2/1907, sang anŏ khăp kơ lŏn ia, hơmâo gru grua hiam, hrăm rơgơi pơplông đĭ rơnuk đưm ƀơi plơi Hành Thiện, să Xuân Hồng (Xuân Trường). Rơbêh 60 thun ngă hơkrŭ (mơ̆ng thun 1925 truh pơ thun 1988), ñu hơmâo Ping gah, Kơnuk kơna đăo kơnang jao bruă prong...Amăng djŏp bruă mă, rơgŏm ơi Trường Chinh lêng kơ ngă bruă truh kih, git gai klă, abih pran jua ngă bruă, khăp ƀu-eng kơ ƀing gŏp, mơnuih ƀôn sang, amăng abih tơlơi hơdip ñu pioh pran jua kơ lŏn ia, gir yua tơlơi rơngai, rơnuk rơnua lŏn ia, yua kơ tơlơi yâo mơak mơnuih ƀôn sang.

Jing sa čô mơnuih hrăm rơgơi yua Khua mir sir Hồ Chí Minh pơtô, jing sa čô khua git gai hơkrŭ lŏn ia, kjăp tơlơi pơmin kơđi čar, Khua git gai Ping gah rơgŏm ơi Trường Chinh pioh glăi kơ Ping gah hăng Kơnuk kơna lu hră pơ-ar yôm, tơlơi pơtô djơ̆ bruă kơđi čar, amăng anun hơmâo hơdrôm hră “Akŏ phun Gru grua Việt Nam” truh ră anai hơdôm tơlơi pơmin gah gru grua mơ̆ng ñu ăt dŏ djơ̆ na nao, jing tơlơi hrăm yôm biă mă kơ Ping gah ta amăng thun blan akŏ pơdong hăng pơgang lŏn ia Việt Nam xã hội chủ nghĩa.