Amăng mông Jơnum, ƀing khua pơ ala hmâo hmư̆ tơlơi gum pơhiăp bơkơtuai bơdjơ̆ nao Tơlơi pơkă mă bruă mơ̆ng  Grŭp mă bruă Ping gah Khua pơ ala mơnuih ƀôn sang dêh čar, rơwang bruă 2020-2025; bruă pơpha jao rơđah rơđông hăng hơdôm Ding kơna Grŭp mă bruă, Ding kơna Grŭp apăn bruă; bruă pơjing hơdôm ƀirô gơgrong bruă pơphô, djru bruă mơ̆ng Ping gah hăng Pơsit pel ĕp Tơlơi pơtrun pơsit Jơnum tal sa Grŭp mă bruă Ping gah Khua pơ ala mơnuih ƀôn sang dêh čar.

Pơhiăp pơđut mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi rơđah mơnuih ping gah khom ngă gru hlâo, pơsit, khom ngă, pơsit pran jua hăng bruă mă rơđah anun kah mơ̆ng hmâo bôh tơhnal; hrŏm hăng anun rơkâo pơtrut kơtang dong bruă pơgang, pơgăn hưp ƀong kông ngăn, tơlơi ngă soh, prai prăk khưi khai, pơđĭ dlông bôh tơhnal bruă pel ĕp, lăng tui hăng pel ĕp rơnuč amăng Khua pơ ala mơnuih ƀôn sang. Prăp lui abih bang hơdôm tơlơi kiăng kơ Jơnum Ping gah hơdôm gưl amăng Ping gah Khua pơ ala mơnuih ƀôn sang, pioh anăp nao Jơnum tal 14 mơ̆ng Ping gah. Gah git gai ngă tui klă bruă jao kơđi čar, Khua git gai pơ ala mơnuih ƀôn sang dêh čar rơkâo đing nao git gai, črâo ba ngă tui ba glăi bôh tơhnal pơdŏng, ngă giong tơlơi phiăn thun 2025 hăng črâo ba mơ̆ng Khua git gai Ping gah dêh čar ơi Tô Lâm kơ pơplih phrâo phun tơlơi pơmin čih pơkra tơlơi phiăn, lăng anai lĕ sa gru than pơplih phrâo amăng ngă giong tơlơi pơkă thun 2025, pơjing phun than kơ Khua pơ ala mơnuih ƀôn sang tal 15, rơwang bruă 2026-2031./.