Amăng mông mă bruă, Khua git gai pơ ala mơnuih ƀôn sang dêh čar pơpŭ tơhan kông ang lêng kơ ba jơlan hlâo amăng bruă dưm dăp hơbot anih anom mă bruă kiăng pơhlôm brơi kơtang, hơbot, mă bruă klă, tŭ yua. Hơbô̆ bruă anai hơmâo djop ƀon lan, ding jum, gơnong bruă pơkŏn hrăm tui. Thun 2025 hơmâo lu hrơi jơnum pơprong amăng lŏn ia, sit biă ñu lĕ 80 thun hrơi akŏ pơjing dêh čar ăt lĕ 80 thun hrơi akŏ pơjing tơhan kông ang mơnuih ƀôn sang, Khua git gai pơ ala mơnuih ƀôn sang dêh čar ơi Trần Thanh Mẫn čang rơmang kông ang pơgiong klă bruă jao thun 2025 pơgôp amăng bruă jao wai pơgang lŏn ia hăng mut hrŏm Ƀirô Khua pơ ala mơnuih ƀôn sang dêh čar amăng bruă čih pơkra tơlơi phiăn, krăo lăng.

Khua git gai pơ ala mơnuih ƀôn sang dêh čar ơi Trần Thanh Mẫn rơkâo tơhan kông ang pok pơhai ngă tui hơdôm tơlơi phiăn hơmâo Khua pơ ala mơnuih ƀôn sang dêh čar tŭ amăng hơdôm tal jơnum, amăng anun pơtrut kơtang bruă pơtô pơblang brơi mơnuih ƀôn sang hluh rơđah hăng ngă tui djơ̆ tơlơi phiăn. Khua ding jum kông ang ơi Lương Tam Quang pơsit tong, tŏ tui boh than ngă hơbot anih anom, gơnong bruă kông ang amra ngă tui bruă dưm dăp mơng gơnong glông truh pơ ƀon lan.