Ƀrô ral hơdor glăi 93 thun hrơi akŏ pơjing Ping gah Cộng sản Việt Nam, hrŏm hăng hrơi mông đơ đam dêh čar glăk dik dak prap čơkă thun phrâo tui phiăn juăt mơng djuai ania ta Tết Quý Mão ƀơi anom bruă git gai ling tơhan wai pơgang guai tơring čar An Giang (plơi prong Châu Đốc, An Giang), Khua git gai pơ ala mơnuih ƀon sang dêh čar ơi Vương Đình Huệ nao čuă, pơpŭ thun phrâo, ƀơk gơnam brơi sang anŏ tui hơdră djru, sang anŏ ƀun rin, mơnuih djuai ania ƀiă hăng ƀing kông nhơn, mơnuih mă bruă tơnap tap amăng tơring čar An Giang.

Thun 2023 him lăng tŏ tui bưp tơnap tap, lông lăng, yua anun, Khua git gai pơ ala mơnuih ƀon sang dêh čar čang rơmang Ping gah, gong gai, ling tơhan hăng mơnuih ƀon sang tơring čar An Giang tŏ ngă tui gru grua sông kơtang mơng rơnuk ngă hơkrŭ, gum pơgôp ha pran sa jua, pơsir hĭ hơdôm tơlơi tơnap tap, tơlơi lông laih dong hluai tui hơdôm tơlơi gal kiăng pơgiong hơdôm hơnong pơkă pơđĭ kyar. Ƀơi anai, Khua git gai pơ ala mơnuih ƀon sang dêh čar ơi Vương Đình Huệ hăng grup hyu mă bruă jao 200 anung gơnam brơi sang anŏ kơnuk kơna rông ba, sang anŏ ƀun rin, mơnuih djuai ania ƀiă hăng kông nhơn sang anŏ tơnap tap amăng tơring čar An Giang; jao gơnam tết brơi ƀing apăn bruă, ling tơhan wai pơgang guai tơring čar An Giang.