Ƀrô bơyan bơnga, thun phrâo hăng hơdor glăi 93 thun hrơi akŏ pơjing Ping gah Cộng sản Việt Nam hing ang (3/2), mơguah lơ 30/1, ƀơi plơi Trường Sơn, să Chân Sơn, tơring glông Yên Sơn, tơring čar Tuyên Quang- anih “akŏ phun kual pơklaih rơngai”, “akŏ phun kual blah wang”, Khua git gai pơ ala mơnuih ƀon sang dêh čar ơi Vương Đình Huệ hơmâo nao pơphun tal pơplông hăng “Tết pla kyâo pioh hơdor na nao kơ Wa Hô” bơyan bơnga Quý Mão 2023. Khua git gai pơ ala mơnuih ƀon sang dêh čar pơsit tong, bơyan bơnga Quý Mão 2023 tŏ tui lĕ thun pơphun “Tết pla kyâo” hơmâo pok pơhai mơng bơyan bơnga Canh Tý găn rơgao 63 thun tui tơlơi jak iâu mơng Khua mir sir Hồ Chí Minh.

Hăng pran jua hur har phrâo, gir run phrâo, bruă mă phrâo, Khua git gai pơ ala mơnuih ƀon sang dêh čar đăo gơnang “Tết pla kyâo pioh hơdor na nao kơ Wa Hô” bơyan bơnga Quý Mão thun 2023 amăng tơring čar Tuyên Quang amra ba glăi boh tŭ yua hiam klă, pơgôp pơjing dêh čar Việt Nam mơtah mơda, pơđĭ kyar hơđong kjăp, tui hăng tơlơi čang rơmang yôm phăn mơng Khua mir sir Hồ Chí Minh: “Bơyan bơnga lĕ tế pla kyâo kiăng ngă kơ lŏn ia jai hrơi hiam klă”.