Ƀơi mông bưp, Khua git gai pơ ala mơnuih ƀon sang ơi Vương Đình Huệ lăi, 40 rơgao, Khul đah kơmơi Ding jum kông an pơđĭ kyar na nao amăng djŏp bruă, mơng anom mă bruă, tơlơi phiăn mă bruă truh kơ mrô ding kơna, tơlơi apăn bruă, pơđĭ kyar na nao mơng djŏp bruă ƀing đah kơmơi hơmâo ngă. Khul jing anih kiăng rim čô ding kơna bơkơjăp tui bruă mă, tơlơi pơmin, jing anih pơtrut pran jua adơi amai gir ngă bruă, đĭ kyar na nao, hăng lu bruă ƀu kơnong hmư̆ hing amăng mơnuih mơnam đôč ôh mơ̆ ăt pioh glăi tơlơi lăp hơdor hiam biă kơ rup đah kơmơi ngă kông an kah hăng: Bruă “Klâo mơta tơlơi triang”, Bruă “Ƀing đah kơmơi Kông an rơgơi bruă čar, triang bruă amăng sang”...Mơng hơdôm bruă anun, hơmâo ƀuh lu gru đah kơmơi Kông an khin hơtai sông kơtang, lu adơi amai jing mơnuih rơgơi kơhnâo, hơmâo arăng đăo gơnang amăng anom bruă wơ̆t hăng amăng mơnuih tơpuôl; mrô đah kơmơi ngă khua jai hrơi lu tui mơn.

Khua git gai pơ ala mơnuih ƀon sang dêh čar lăi, ƀơi anăp tơlơi kiăng pơđĭ kyar phrâo mơng lŏn ia, ping gah, kơnuk kơna ta jai hrơi lăng ba, pơđĭ kyar abih bang hăng djŏp bruă hloh hăng ƀing đah kơmơi dêh čar ta, biă ñu mơtăm lĕ bruă iâu pơthưr ƀing đah kơmơi, yua tơlơi dưm kơnar, yâo mơ-ak hăng pơplih klă tui. Khua git gai pơ ala mơnuih ƀon sang dêh čar git gai, khua mua, đah kơmơi amăng Kông an mơnuih ƀon sang khŏm gir hrăm bruă kơjăp tui, ngă bruă hơdeč hmar, dưi găn rơgao tơnap tap juăt hơmâo mơng ƀing đah kơmơi.