Tlam lơ 14/5, Khua git gai pơ ala mơnuih ƀôn sang dêh čar ơi Vương Đình Huệ mă bruă hăng Khua mua ping gah tơring čar Hà Nam kơ tơlơi pơhing pok pơhai ngă tui Hră pơtrun ping gah dêh čar tal 13, hră pơtrun 20 mơ̆ng ping gah tơring čar hrom hăng boh tơhnal ngă tui pơđĭ kyar bơwih ƀong huă mơnuih mơnam, yua prăk kơnuk kơna amăng pă blan akŏ thun anai. Pơhiăp ƀơi mông mă bruă, Khua git gai pơ ala mơnuih ƀôn sang dêh čar ơi Vương Đình Huệ tŭ ư hăng anăp mă bruă, tơhnal pơtrun hăng hơdră mơ̆ Ping gah tơring čar Hà Nam hơmâo pơtong laih truh rơnuč thun 2023 hăng mơkrah rơwang bruă dŏ glăi mơ̆ng ping gah.

Ơi Vương Đình Huệ pok pơthâo brơi bruă či ngă pơ anăp adih kơ tơring čar Hà Nam, ăt khom ngă klă bruă akŏ pơdong ping gah, kơđi čar, djă kjăp gru grua đưm tơlơi hơkrŭ, thâo gum pơgôp nao rai, mơnuih ƀôn sang ngă khua pô, mă bruă tơpă hnong, pơtrut bruă mă thâo pơčeh phrâo, gir run hloh kiăng ngă giong tŭ yua bruă jao. Kơ man pơdong plơi pla phrâo, pơ anăp adih, Hà Nam kiăng pơtrut tui jơlan gah ngă hmua pơgang rơgoh ayuh hyiăng anih dŏ jum dar, plơi pla phrâo hiam hăng mơnuih ƀôn sang thâo rơgơi.