Čơtlăm lơ 7/3, ƀơi Sang mă bruă Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ tŭ jum Khul pơlir hơbit hơdôm khul bơwih ƀong Japan (Keidanren) glăk dô̆ čuă, mă bruă ƀơi dêh čar Việt Nam hăng nao pơhmư̆ Bruă bơkơtuai bơwih ƀong gưl dlông Việt Nam – Japan ƀrô djơ̆ tal hơdor glăi 50 thun pơdŏng bruă pơtom hiăp Việt Nam hăng Japan (21/9/1973 – 21/9/2023).

Pơhiăp amăng mông tŭ jum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, pơanăp anai, Khua pơ ala mơnuih ƀôn sang Việt Nam amra ĕp lăng sa dua tơlơi phiăn yôm phăn, kah hăng rơwang bruă Tơlơi phiăn lŏn mơnai (pơplih pơkra), Tơlơi phiăn bơwih ƀong lŏn sang (pơplih pơkra), Tơlơi phiăn pơplih pơkra, pơhrua nao sa dua mơta tơlơi mơng Tơlơi phiăn pơphun brơi čan prăk, Tơlơi phiăn pơđĭ kyar bruă măi mok. Khua git gai wai lăng pơ ala mơnuih ƀôn sang dêh čar ta rơkâo, Keidanren hrom hăng hơdôm anom bơwih ƀong dêh čar Japan đing nao hăng gum pơhiăp kiăng Khua pơ ala mơnuih ƀôn sang dêh čar Việt Nam ngă giong hơdôm rơwang bruă tơlơi phiăn yôm phăn anai. Khua pơ ala Keidanren ƀuăn amra gum hrom hơdôm bôh anom bơwih ƀong Japan gir run abih pran jua pô gum hơgôp kơ tơlơi pơđĭ kyar mơng đơ đam Việt Nam hăng Japan pơ̆ anăp anai, djru hrom Kơnuk kơna Việt Nam ngă tui hơdôm tơhnal pơkă hmâo ba tơbiă./.