Tlam lơ 17/5, ƀơi anom bruă ping gah dêh čar, yă Trương Thị Mai, ding kơna ding jum kơđi čar, Khua gum bruă git gai ping gah, tŭ jum Grup khua mua Jơnum min Pơgang bruă hơkrŭ dêh čar Cuba, yua kơ ơi Gerardo Hernandez Nordelo, ding kơna apăn bruă ping gah dêh čar Cuba, ding kơna Khul git gai lŏn ia Cuba, Khua Jơnum min Pơgang bruă hơkrŭ dêh čar Cuba, ngă khua khul rai čuă hăng mă bruă ƀơi Việt Nam.

Yă Trương Thị Mai lăi pơtong, Ping gah, kơnuk kơna hăng mơnuih ƀôn sang Việt Nam jĕ giăm hrom hơbit na nao hăng Ping gah, kơnuk kơna laih anun mơnuih ƀôn sang Cuba gơyut gơyâo tong ten adơi ayong, ba tơlơi ngă giăng mah dua bơnah dêh čar pơđĭ kyar ƀu pơdơi ôh, jai hrơi hiam klă hloh amăng črăn phrâo. Ơi Gerardo Hernandez Nordelo ăt lăi pơtong, tơlơi khăp adơi ayong gum pơgôp nao rai, lir hơbit hăng tơlơi pơpŭ mơ̆ng mơnuih ƀôn sang Cuba pioh kơ mơnuih ƀôn sang hăng lăng tui tơlơi khin hơtai mơ̆ng djuai ania Việt Nam lơ̆m rơnuk blah ayăt pơklaih rơngai djuai ania hlâo adih hăng rơnuk pơblih phrâo ră anai prong biă mă.