Khul pơsur hrăm hră Việt Nam dưi pơdŏng amăng blan 10/1996. Truh ră anai, Khul hmâo giăm truh 27 klăk čô mơnuih, pơjing hơdôm anih anom mă bruă djop anih, djru bruă pơtrut pơsur hrăm hră, mơnuih rơgơi, pơjing mơnuih mơnam hrăm hră jai hrơi jai pơđĭ kyar. Amăng mông bưp ƀô̆ mơta, pơ ala kơ khua git gai Ping gah, Kơnuk kơna, Khua mir sir dêh čar ơi Lương Cường bơni, pơsit yôm hơdôm tơlơi gum hơgôp kret kruai mơ̆ ba glăi bôh tơhnal mơ̆ng ƀing apăn bruă pơsur hrăm hră.

Khua mir sir lăi rơđah, mơ̆ng hrơi pơdŏng dêh čar truh ră anai, Ping gah, Kơnuk kơna hăng Wa Hồ kiăng khăp biă ñu lăng yôm pơđĭ bôh thâo hră kơ mơnuih ƀôn sang, pơtô pơhrăm mơnuih mă bruă, pơhrăm brơi dong mơnuih rơgơi. Lăng bruă pơtô pơhrăm lĕ “hơdră bruă lŏn ia ba jơlan hlâo”, jing hơdră pơtrun ha sa hăng hluh gah amăng bruă pơdŏng hăng pơđĭ kyar lŏn ia. Bruă pơhrăm hăng dưi pơsur hrăm hră ƀu kơnong kơ tơhnal thâo mơ̆ng ană mơnuih ôh mơ̆, ñu dô̆ jing tơlơi kiăng biă pơđĭ dlông bôh thâo bơkơtưn lŏn ia, pơđĭ kyar mơnuih thâo rơgơi, hăng hơkrŭ đĭ pran djuai ania pioh yak mut amăng rơnuk phrâo./.