Khua mir sir dêh čar ta ơi Tô Lâm phrâo bưp ƀô̆ mơta grŭp khua pơ ala git gai khul đăo, hơdôm khul grŭp đăo. Bruă bưp ƀô̆ mơta hmâo tơlơi gum hrŏm mơ̆ng ƀing khua mua, khua apăn bruă 45 khul đăo gah 16 mơta tơlơi đăo dưi hmâo Ping gah, Kơnuk kơna tŭ yap. Amăng mông bưp ƀô̆ mơta, Khua mir sir dêh čar ta ơi Tô Lâm mơ-ĭt truh abih bang khul grŭp, khua mua, apăn bruă đăo, neh wa tui đăo amăng đơ đam dêh čar tơlơi tơña bla tâ̆o klă, dơlăm mơ̆ng Khua git gai Ping gah dêh čar ta ơi Nguyễn Phú Trọng.

Hrŏm hăng anun mơ-ĭt truh ƀing khua khul đăo pơ ala kơ hơdôm khul đăo tơlơi hơ-ưč hmưi suaih pral, yâo mơ-ak, gum hrŏm anăp nao jơlan gum hrŏm hăng djuai ania. Khua mir sir dêh čar ta čang rơmang, ƀing khua mua khul đăo pơdah klă hloh dong bruă mă lĕ pô tô nao rai yôm phăn kơplah wah Ping gah, Kơnuk kơna truh hăng neh wa tui đăo; iâo pơthưr neh wa tui đăo amăng lŏn ia hăng pơ̆ dêh čar tač rơngiao, gum hrŏm hơbit hăng neh wa, mơnuih ƀôn sang đơ đam dêh čar anăp nao klă hơdôm bruă bơkơtưn khăp kơ lŏn ia, pơđĭ kyar bơwih ƀong – bôh thâo – mơnuih mơnam, pơhlôm pơgang lŏn ia, rơnuk rơnua plơi pla, pơtom hiăp; ngă gru ngă tui hơdră pơtrun, jơlan gah mơ̆ng Ping gah hăng hơdră bruă, tơlơi phiăn mơ̆ng Kơnuk kơna; ngă tui klă bruă mă, bruă jao, gơgrong mơ̆ng ană mơnuih, ngă tui jơlan đăo gưt nao hrŏm hăng djuai ania./.