Jơnum lăi pơthâo tơlơi pơtrun mơng Khua dêh čar tŭ yap bruă dưm dăp man pơdong kual Dap kơdư amăng rơwang thun 2021-2030, anăp nao truh thun 2050. Tui anun, rơwang thun 2021-2030 kual Dap kơdư ba tơbiă hơnong pơkă pơđĭ kyar pơkra pơjing gơnam mơng 7-7,5%; pơhrui glăi mơng rĭm akŏ mơnuih giăm 130 klăk prăk. Jơnum anai ăt lăng glăi rơbêh 1 thun ngă tui tơlơi pơtrun mrô 23 mơng Ding jum kơđi čar hăng jơlan hơdră bruă mă mơng Kơnuk kơna amăng pơđĭ kyar bơwih ƀong huă, mơnuih mơnam, pơhlôm rơnuk rơnua amăng kual Dap kơdư.

Đĭ pơhiăp pơđut mông jơnum, Kơ-iăng khua dêh čar ơi Trần Lưu Quang brơi thâo, amăng thun blan tơlơi bơwih ƀong huă, mơnuih mơnam amăng kual Dap kơdư hơmâo lu tơlơi pơplih phrâo. Hơdôm boh tơring čar ăt dưi hrưn đĭ kơtang amăng thun blan pơ anăp hăng 3 mơta bruă. Anun lĕ tơkuh nao rai jơlan glông. Dua dong lĕ pơđĭ kyar hơbô̆ bruă bơwih brơi tuai čuă ngui tui bruă pơlir nao rai samơ̆ djop kual kiăng hơmâo anŏ yôm phara. Tlâo lĕ, dưi djru nao rai kiăng pơhưč anom bruă tuh pơ alin amăng lŏn ia hăng tač rơngiao.