Čơtlăm lơ 26/9 yap tui mông dêh čar Cuba, mông ngă Lơphet čơkă sit nik Khua git gai Ping gah, Khua mir sir dêh čar ta ơi Tô Lâm hăng Bơnai ñu hrŏm hăng Grŭp khua pơ ala kơ gưl dlông dêh čar Việt Nam nao čuă gưl Kơnuk kơna pơ̆ dêh čar Cuba hmâo pơphun yôm phăn ƀơi plơi prong jưh jom Lahabana. Tơdơi kơ mông ngă lơphet čơkă jum, Khua git gai Ping gah, Khua mir sir dêh čar ta ơi Tô Lâm hrŏm hăng Khua git gai Ping gah tal sa, Khua mir sir dêh čar Cuba Miguel Diaz – Canel Bermudez ba jơlan hlâo grŭp gưl dlông dua bôh dêh čar pơphun bơkơtuai. Dua gơñu hmâo lăi rơđah kơ tơlơi djơ̆ hrŏm kơplah wah Việt Nam hăng Cuba kơ gru grua hăng pran jua, jơlan nao djop mơnuih dưm kơnar hăng tơlơi rô nao rai kơjăp dưi hmâo Khua mir sir Hồ Chí Minh hăng Khua pơtrun bruă tơhan Fidel Castro pơdŏng pơjing, ngă kơjăp găn rơgao tui thun blan. Dua gơñu pơsit pran jua pơđĭ kyar kơtang dong bruă rô nao rai gum hrŏm hơbit mơ̆ng hlâo, biă ñu giăng mah, gum hrŏm abih bang Việt Nam hăng Cuba truh rơnoh dlông phrâo hloh, sit nik, ba glăi bôh tơhnal hăng kơjăp phik hloh. Dua gơñu tŭ ư gum hrŏm pơphun klă bruă Bơkơtuai pơblang tal 6 kơplah wah dua Ping gah hăng Bơkơtuai bôh thâo phrâo jar kơmar tal II kơ tơhnal lăng bruă hơkrŭ mơ̆ng Khua mir sir Hồ Chí Minh hăng Khua git gai bruă hơkrŭ dêh čar Cuba Fidel Castro hăng hơdôm bruă gum hrŏm pơkon amăng hơdôm hrơi pơ̆ anăp. Amăng mông bơkơtuai, Khua git gai Ping gah, Khua mir sir dêh čar ta ơi Tô Lâm lăi pơthâo hăng Khua git gai Ping gah tal sa, Khua mir sir dêh čar Cuba Miguel Diaz – Canel Bermudez kơ bruă Ping gah, Kơnuk kơna hăng mơnuih ƀôn sang dêh čar Việt Nam brơi kơ mơnuih ƀôn sang Cuba adơi ayong 10.000 tơn braih; Khul mut phung dêh čar Việt Nam brơi kơ Anom hơdôm mơnuih mă bruă Cuba hăng sa dua bôh tơring čar ƀôn prong gah dêh čar Việt Nam ăt brơi mơn kơ mơnuih ƀôn sang Cuba sa dua mơta gơnam tam.

Čơtlăm lơ 26/9 yap tui mông ƀơi Cuba, Khua git gai Ping gah, Khua mir sir dêh čar ta ơi Tô Lâm hmâo bơkơtuai mơn hăng Khua git gai wai lăng pơ ala mơnuih ƀôn sang Gong gai mơnuih Mơnuih ƀôn sang Cuba Esteban Lazo Hérnandez./.