250 čô mơnuih pơ ala brơi rơbêh kơ 378 rơbâo čô mơnuih djuai ania amăng tơring čar nao pơhmư̆, amăng anun hmâo lu mơnuih ba gru hlâo amăng bruă pok phun bruă mă, pơđĭ kyar bơwih ƀong, hrưn đĭ ngă pơdrŏng.

Jơnum ba tơbiă tơhnal hrưn đĭ truh thun 2030, pơhrui glăi hơnong ñu kual djuai ania ƀiă hmâo mơ̆ng 84 truh 87 klăk prăk sa čô mơnuih sa thun; hăng mrô sang anô̆ ƀun rin hrŏ trun mơ̆ng 2-3% sa thun... Lar hyu kơtang hơdôm bruă pok phun, bơkơtưn ngă đang hmua; đing nao tuh pơplai djop mơta pơđĭ kyar wot bơwih ƀong sang anô̆, anom bơwih ƀong, anom mă bruă hrŏm ƀơi hơdôm bôh plơi pla amăng tơring čar. Jơnum pơtŏng sit, tơlơi hơdip neh wa djuai ania ƀiă tơring čar Lâm Đồng dưi pơđĭ tui abih bang. Bruă tŭ mă hăng mă yua hmao tlôn bôh thâo phrâo amăng ngă đang hmua hmâo djru pơhrui glăi hơnong ñu hmâo 50 klăk prăk sa čô mơnuih sa thun, đĭ 12,5% bơhmu hăng thun 2019; Biă ñu, ră anai tơring čar hmâo 353 bôh anom bơwih ƀong yua mơnuih djuai ania ƀiă ngă pô, hăng abih bang prăk mă yua đĭ truh 2.773 klai prăk.

Pơhiăp amăng mông jơnum, ơi Y Vinh Tơr, Kơ-iăng Khua Jơnum min djuai ania djă pioh, jơlan hơdră pơđĭ kyar bơwih ƀong – mơnuih mơnam kual djuai ania ƀiă mơ̆ng tơring čar ba glăi bôh tơhnal pơhlôm biă. Kiăng ngă tui dong hơdôm bôh tơhnal dưi ngă, ơi Y Vinh Tơr lăi lĕ, Lâm Đồng khom đing nao lu tơlơi pơplih phrâo hơdôm ngăn rơnoh kơ kual djuai ania ƀiă, pơtrut kơtang lu jơlan hơdră pơkă mơ̆ng dêh čar gah pơdŏng plơi pla phrâo hăng hrŏ trun ƀun rin kơjăp./.