Tơdơi kơ mông pok pơphun Tal jơnum ƀu hmâo pơkă hlâo tal 9 ƀing khua pơ ala mơnuih ƀôn sang dêh čar hmâo bơkơtuai ƀơi grŭp kơ rơwang bruă Tơlơi phiăn pơplih pơkra, pơhrua nao sa dua mơta tơlơi amăng Tơlơi phiăn pơphun bruă Khua pơ ala mơnuih ƀôn sang hăng Rơwang bruă Tơlơi phiăn mă yua hră pơ-ar pơkă rơwang tơlơi phiăn (pơplih pơkra). Bơkơtuai ƀơi grŭp, Khua mir sir dêh čar ta ơi Lương Cường lăi akô̆ pơkă pioh truh lĕ khom rơbô̆t, mă bruă tŭ yua, ba glăi bôh tơhnal.

Bruă pơphun glăi khom ngă brơi glông bruă phrâo klă hloh ba glăi bôh tơhnal hloh. Kiăng bruă mă ba glăi tŭ yua, ba glăi bôh tơhnal , rơgao kơ pel ĕp ră anai dô̆ gun năng ai ñu 5.000 mơta Tơlơi phiăn hăng hră pơ-ar gah yŭ Tơlơi phiăn, amăng anun hmâo rơbêh kơ 200 mơta tơlơi phiăn kiăng pơplih pơkra, pơhrua nao. Khua mir sir dêh čar ta rơkâo amăng tal jơnum ƀu hmâo pơkă hlâo tal 9 đing nao pơplih pơkra 2 tơlơi phiăn hăng 5 mơta tơlơi pơtrun pơsit bơdjơ̆ nao pơphun bruă pioh pok pơhai Tơlơi pơtrun pơsit 18. Khua mir sir dêh čar ta rơkâo đing nao gum pơhiăp amăng rơwang bruă Tơlơi phiăn pơplih pơkra, pơhrua nao sa dua mơta tơlơi amăng Tơlơi phiăn Pơphun bruă Khua pơ ala mơnuih ƀôn sang hăng Rơwang bruă Tơlơi phiăn mă yua hră pơ-ar pơkă tơlơi phiăn (pơplih pơkra); bruă pơplih pơkra khom lăp djơ̆ hăng bôh nik hmâo hăng djơ̆ tơlơi kiăng kơ bruă mă klă hloh, kơtang hloh./.