Ƀơi tơring glông Hàm Thuận Bắc, tơring čar Bình Thuận, Khul hlăk ai rơnuk Hồ Chí Minh dêh čar ta phrâo pơphun ngă Lơphet pok phun Blan hlăk ai 2023 hăng anăn ñu “Hlăk ai ba jơlan hlâo pơplih mrô”.Pơhiăp amăng mông ngă lơphet, Khua mir sir jăng jai dêh čar ta yă Võ Thị Ánh Xuân lăi lĕ, pơplih phrâo jing bruă mă tơnap, lu tơlơi lông, khom hmâo tơlơi git gai, črâo ba mơng Khul hlăk ai dêh čar; tơlơi pơsit prong, hur har, pơčeh phrâo mơng hơdôm gưl khul; tơlơi gum hrom klă, ba jơlan hlâo mơng hlăk ai đơ đam dêh čar kiăng pơjing bruă mă prong dơlăm, djru ngă brơi Việt Nam jing lŏn ia mrô, hơđong hăng pơdrong, ba jơlan hlâo lông lăng hơdôm hơdră phrâo măi mok hăng hơdră phrâo amăng thun 2030.

Tơdơi kơ mông ngă lơphet pok phun hmâo laih lu bruă mă pơphun kah hăng: Čuă, ƀơk gơnam tam kơ ƀing čơđai sang hră, hlăk ai mơnuih mă bruă hmâo tơlơi hơdip tơnap, ƀing Amĭ Việt Nam sông kơtang; ƀơk hơdôm ring bruă, črăn bruă hlăk ai tŭ yua biă. Abih bang nua hơdôm gơnam, ring bruă hmâo ƀơk brơi ƀơi tơring čar Bình Thuận mơng Kơnuk kơna amăng mông ngă Lơphet pok phun Blan hlăk ai lĕ giăm truh 15 klai prăk./.