Khua mir sir jăng jai yă Võ Thị Ánh Xuân bơni kơ ơi Fernando Appariscio da Silva hơmâo ngă giong bruă jao, khua anih jưh pơ ala dêh čar Brazil ƀơi Việt Nam rơwang bruă laih rơgao; lăng yôm bruă mă pran jua pơgôp hrom mơ̆ng ñu, djru ngă kjăp hăng pơđĭ kyar tui tơlơi giăng mah rô nao rai hlôm Việt Nam-Brazil jai hrơi tŭ yua hloh.

Biă mă ñu, pơblih nao rai bruă mă sĭ mơdrô dua bơnah ba glăi boh tơhnal đĭ na nao amăng rĭm thun, Brazil ăt jing bơnah sĭ mơdrô prong hloh mơ̆ng Việt Nam ƀơi kual Mỹ La tinh hăng rơnoh prăk sĭ mơdrô pơhrui glăi amăng thun 2022 truh kơ 6 klai 78 klăk USD. Hrom hăng anun, bruă ngă hrom gah bruă hmua, ba tuai čuă ngui, bruă gru grua thâo thăi, bruă jĕ giăm mơnuih ƀôn sang dua bơnah hơmâo pơtrut tui, pơđĭ kyar biă mă.