Thun anai, Ding jum Pơtô hăng Pơjuăt mơ-it nao 7 grup čơđai sang hră rơgơi mơ̆ng Việt Nam hăng 38 wơ̆t pơplông Olympic jar kmar. Boh tơhnal abih bang čơđai sang hră Việt Nam nao pơplông lêng kơ hơmâo mă pri soh. Lu grup mơ̆ng Việt Nam ăt dŏ amăng 10 grup hơmâo mă pri lu hloh laih anun mrô čơđai sang hră nao pơplông lu hloh. Jao tơlơi apah bơni hăng 10 miđai mă bruă mrô dua, 7 miđai mă bruă mrô klâo kơ ƀing čơđai mă pri rơgơi hloh tal pơplông Olympic hăng mă pri boh thâo ia rơgơi jar kmar thun 2022. Pơhiăp ƀơi mông bưp ƀô̆ mơta, Khua mir sir ơi Nguyễn Xuân Phúc pơdah pran jua hok mơak bưp ƀô̆ mơta čơđai sang hră yua tơlơi hok mơak ba glăi tơlơi hing ang kơ dêh čar.

Khua mir sir ơi Nguyễn Xuân Phúc lăi pơtong, gru grua phiăn đưm mơ̆ng djuai ania ta ăt đing nao kơ bruă pơtô hrăm. Ping gah, Kơnuk kơna ta đing nao biă mă kơ bruă pơtô hrăm mơnuih rơgơi kơhnâo, yua bruă pơtô hrăm yơh jing bruă mă yôm mrô sa, pioh lu pran jua prăk kăk gleng nao hlâo tuh pơ alin kơ bruă pơđĭ kyar dêh čar.