Tlam lơ 19/12, ƀơi Hà Nội, Ling tơhanpơgang hăng blah hăng rơngĭt adai pơphun yôm phăn mông bưp ƀô̆ mơta ƀrô tal hơdor glăi 50 thun blah dưi “Hà Nội - Điện Biên Phủ” hăng čơkă Khua mir sir nao čuă, mă bruă ƀơi khul ling tơhan ƀrô tal hơdor glăi 78 thun hrơi akŏ pơjing Khul ling tơhan mơnuih ƀon sang Việt Nam hăng 33 thun hrơi wai pơgang rơnuk rơnua amăng abih bang mơnuih. Đĭ pơhiăp amăng mông bưp, Khua mir sir ơi Nguyễn Xuân Phúc lăi rơđah, blah dưi Hà Nội - Điện Biên Phủ hăng rơngĭt adai pơdah tơlơi git gai lăp djơ̆ mơng Ping gah, Khul ling tơhan dêh čar ta, anai lĕ blah dưi pơdah pran kơtang, pran mut hrŏm amăng abih bang mơnuih ƀon sang Việt Nam; lĕ pran gơgrong, gir run, khin hơtai blah pơkiăo đuăi ayăt Mi. Mơng tal blah dưi anai, Khua mir sir ơi Nguyễn Xuân Phúc brơi thâo, hơmâo lu tơlơi pơhrăm glăi kiăng dưi ngă yua, pơčeh phrâo amăng rơnuk pơjing hăng wai pơgang lŏn ia ră anai.

Pơpŭ bơni hơdôm tơlơi dưi ngă mơng Ling tơhan pơgang, blah hăng rơngĭt adai giăm 60 thun laih rơgao, Khua mir sir dêh čar ăt lăi nao hơdôm tơlơi găn rơgao amăng bruă pơjing hăng wai pơgang lŏn ia ră anai, laih dong rơkâo Ling tơhan kiăng ngă tui gru grua sông kơtang, đing nao pơjing khul ling tơhan kơtang wŏt gah mơnuih hăng phao kơtuang, gơnam măi mok, lăng ană mơnuih lĕ akŏ phun - anŏ amra ba glăi tơlơi dưi amăng wai pơgang lŏn ia.