Khua mir sir ơi Lương Cường lăi pơtong tal rai čuă mơng Khua ding jum Robert Dussy hăng grup khua mua Togo yôm phăn biă mă, pơgôp pơtrut ƀiă dong tơlơi rô nao rai giang mah hăng ngă hrŏm djop mơta kơplah wah dua boh dêh čar, sit biă ñu amăng hrơi blan Việt Nam hăng Togo glăk anăp nao tal hơdor glăi 50 thun hrơi akŏ pơjing bruă pơtom hiăp (8/2/1975-8/2/2025).

Kơ bruă ngă hrŏm gah ngă hmua, hăng tơlơi găn rơgao amăng lu akŏ bruă ngă hrŏm gah ngă hmua mơng tlâo bơnah ba glăi tơlơi truh kih ƀơi kual Ơi jŭ, amăng anun hơmâo Togo hăng tơlơi gơgrong lĕ sa amăng hơdôm boh dêh čar sĭ mơdrô gơnam đang hmua prong hloh amăng rŏng lŏn tơnah, Khua mir sir brơi thâo, Việt Nam amra gum hrŏm pok pơhai hơdôm akŏ bruă ngă hrŏm kiăng pơlăi nao rai, črâo brơi boh thâo, pơkiăo nao ƀing rơgơi kơhnâo djru gah bruă ngă hmua.