Mơguah lơ 22/12, ƀơi sang bruă khua mir sir či ƀôn prong Bogor, tơring čar Yŭ Java, Khua mir sir dêh čar Indonesia, ơi Joko Widodo git gai jơnum čơkă jum gưl kơnuk kơna Khua mir sir dêh čar ta ơi Nguyễn Xuân Phúc. Tơdơi kơ pơphun jơnum tŭ jum kơdrưh ang, Khua mir sir ơi Nguyễn Xuân Phúc bơkơtuai hăng Khua mir sir dêh čar Indonesia ơi Joko Widodo. Ƀơi mông bơkơtuai, Khua mir sir ơi Nguyễn Xuân Phúc lăi pơtong, Việt Nam ƀuăn dong yua dêh čar Indonesia ngă khua ASEAN thun 2023 tŭ yua hăng dêh čar Indonesia tŭ ư kơ Việt Nam ngă giong bruă jao ding kơna Khul pơgang tơlơi dưi ană mơnuih mơ̆ng Sang gum hơbit djop dêh čar rơwang thun 2023-2025.

Dua čô khua tŭ ư brơi lui hĭ tơlơi gun sĭ mơdrô pioh ngă tui djơ̆ tơhnal pơkă rơnoh prăk pơhrui glăi dua bơnah rơbêh 15 klai USD hlâo kơ thun 2028 ăt kah hăng bruă ngă hrom sĭ mơdrô apui lơtrik, ia jâo pơkra ming glăi, hrĕ apui lơtrik rơgơi hăng pơkra pil rơdêh ôtô pơkĕ apui lơtrik. Dua čô khua ăt lăi pơthâo sit nik dua boh dêh čar pơđut 12 thun bơkơtuai pơkă guai kual wai lăng amăng ia rơsĭ hăng tŭ ư pơgang tơlơi kiăng mơ̆ng ASEAN kơ bruă rô nao rai ƀơi ia rơsĭ Ngŏ.