Anai lĕ tal nao čuă blung a mơng sa čô khua pơprong mơng Việt Nam pơ Indonesia dong mơng hrơi Jơnum Ping gah tal XIII kah hăng lơ̆m klin Covid-19 hơđuh đĭ. Sit biă ñu, anai ăt lĕ tal nao čuă gưl Kơnuk kơna blung a mơng Khua mir sir Việt Nam pơ Indonesia tơdơi kơ 9 thun hăng hrơi blan dua bơnah anăp nao hơdor glăi 10 thun akŏ pơjing tơlơi rô nao rai ngă hrŏm yôm phăn (2013-2023).

Hăng hơdôm tơlơi gal amăng ngă hrŏm ră anai kơplah wah dua bơnah, tal nao čuă gưl Kơnuk kơna pơ Indonesia mơng Khua mir sir ơi Nguyễn Xuân Phúc yôm phăn biă mă, pơgôp hơkrŭ glăi tơlơi đăo gơnang, ngă dơlăm tui dong tơlơi rô nao rai ngă hrŏm djop mơta, ba tơlơi rô nao rai yak nao rơwang pơđĭ kyar kơtang ƀiă dong.