Khua mir sir lăi pơtong, Việt Nam lăng bruă pơđĭ kyar giăng mah, rô nao rai hăng dêh čar Khač lĕ sa jơlan hơdră ruah mă djơ̆ lăp, đing nao hlâo amăng abih bang jơlan hơdră pơtom hiăp rơngai, ngă pô, gum hrŏm lu bơnah, lu hơdră pơtom hiăp mơ̆ng Việt Nam. Pơ anăp adih, Khua mir sir čang rơmang dua bơnah ăt ngă hrŏm tong ten amăng djop bruă kah hăng pơphun jơnum bưp nao rai, jĕ giăm ƀing khua mua pơprong, pok pơhai tŭ yua tơlơi phiăn ngă hrŏm; pơtrut pơđĭ tui boh tŭ yua ngă hrŏm djop bruă, pơtruh nao rai jơlan rơdêh treng, jơlan rơdêh găn rơgao nao rai ƀơi guai dêh čar dua bơnah, ngă djơ̆ tơhnal pơkă ƀơi hơdôm tơring čar gah kơdư dêh čar Việt Nam; rơkâo gah dêh čar Khač ăt pok pơhư prong anih anom sĭ mơdrô blơi boh troh gơnam tam đang hmua, blơi añăm hlô mơnong, mơnŭ bip mơ̆ng Việt Nam ba sĭ.

Anăp nao thun pơkă 2025, ƀrô hơdor glăi 75 thun dua bơnah akŏ pơjing bruă pơtom hiăp Việt Nam-Khač, Khua mir sir ơi Tô Lâm rơkâo dua bơnah dêh čar gir run pơtrut tui, ba tơlơi ngă giăng mah đĭ nao sa yak dlông phrâo, jai hrơi ba glăi boh tŭ yua, hiam klă hloh.