Ƀơi mông tŭ jum, Khua mir sir ơi Võ Văn Thưởng bơni hơ-ơč kơ dêh čar Kur hơmâo pơphun truh kih bruă ruah khua pơ ala mơnuih ƀon sang să, phường tal 5; pơhlôm ngă truh kih bruă gơgrong ngă Khua ASEAN hăng AIPA amăng thun 2022, mơng anun dêh čar Kur hơmâo kơdrưh hloh, hơmâo jar kmar đăo gơnang hloh.

Khua mir sir dêh čar ta brơi thâo, dua boh dêh čar hơmâo pơphun truh kih lu tal pơbưp khua mua kơplah wah Ping gah, Kơnuk kơna dua bơnah; prăk sĭ mơdrô nao rai hơmâo lu mơn; bruă ngă hrŏm bơwih ƀong huă, pơbưp mơnuih ƀon sang hơmâo pơphun lu, amăng anun mơnuih ƀon sang ƀơi hơdôm boh tơring čar giăm guai hơmâo bưp nao rai. Khua mir sir ơi Võ Văn Thưởng tŭ ư hăng Kơ-iăng khua dêh čar Samdech Krolahom Sar Kheng kơ bruă pơtrut ngă hrŏm ƀơi guai dêh čar hluai tui hơdôm jơlan amăng jang, ngă giong bruă hlă gong guai, mơng anun man pơkra jơlan guai rơnuk rơnua, rơngai, ngă hrŏm hăng đĭ kyar.