Tŏ tui jơnum lok 7, hrơi anai (25/5), Khua pơ ala mơnuih ƀôn sang dêh čar pioh ha hrơi pơčrông sai ƀơi sang jơnum kơ hră lăi pơthâo mơng grup krăo lăng hăng črăn tơlơi pơtrun mơng Ƀirô Khua pơ ala mơnuih ƀôn sang dêh čar kơ boh tơhnal krăo lăng “bruă ngă tui tơlơi pơtrun mrô 43 thun 2022 mơng Ƀirô Khua pơ ala mơnuih ƀôn sang dêh čar  kơ hơdră yua prăk kak djru brơi jơlan hơdră hơkrŭ, pơđĭ kyar bơwih ƀong huă-mơnuih mơnam hăng hơdôm tơlơi pơtrun mơng Ƀirô Khua pơ ala mơnuih ƀôn sang dêh čar kơ sa, dua akŏ bruă yôm phun amăng dêh čar truh abih thun 2023. Sa, dua hơdră djru amăng hơdôm tơlơi pơtrun anai, hlâo anun arăng lăng hơdră djru hmao tlôn brơi lu anom bơwih ƀong sĭ mơdrô hăng mơnuih mă bruă găn rơgao tơnap tap tơdơi kơ abih klin Covid-19.

Mơng sit sik krăo lăng bruă ngă tui tơlơi pơtrun mrô 43 mơng Ƀirô Khua pơ ala mơnuih ƀôn sang dêh čar brơi ƀuh, bruă ba tơbiă tơlơi pơtrun anai lĕ bruă lăp djơ̆, hmao tlôn amăng thun blan tơlơi bơwih ƀong huă-mơnuih mơnam đơ đam dêh čar dong ƀơi anăp lu tơlơi tơnap tap yua bơbeč nao mơng klin Covid-19. Yua anun tơlơi bơwih ƀong huă dưi hơkrŭ glăi kơtang amăng thun 2022, hăng rơnoh pơđĭ kyar GDP rơbêh 8%, anai lĕ rơnoh pơđĭ kyar lu hloh mơng thun 2011-2022. Grup krăo lăng mơng Ƀirô Khua pơ ala mơnuih ƀôn sang dêh čar ăt lăng glăi: Hơdôm hơdră prăk kak, brơi čan prăk amăng tơlơi pơtrun mrô 43 hơmâo djru brơi hmao tlôn ngă plai ƀiă tơnap tap brơi ƀing anih anom bơbeč nao kơtang hloh mơng klin Covid-19 amăng hơdôm thun blan tơnap tap hloh.