Tơdơi Khua pơ ala mơnuih ƀon sang tơring čar Kon Tum lăi pơthâo brơi giăm 100 čô mơnuih lĕ kông nhơn, mơnuih mă bruă kơ bruă mă mơng Khua pơ ala mơnuih ƀon sang tơring čar; bruă prap lui jơlan hơdră, boh tơhnal jơnum lok 5, Khua pơ ala mơnuih ƀon sang dêh čar tal XV amra pơphun amăng lơ 22/5 pơ anăp, Khul apăn bruă khul pơlir hơbit mơnuih mă bruă tơring čar Kon Tum hơmâo lăi pơthâo djop tơlơi pơgôp, rơkâo đĭ mơng kông nhơn, mơnuih mă bruă amăng tơring čar hăng Khua pơ ala mơnuih ƀon sang.

Tui anun, ƀing kông nhơn, mơnuih mă bruă amăng tơring čar Kon Tum hơmâo pơgôp, rơkâo đĭ hăng Khua pơ ala mơnuih ƀon sang tơring čar 6 grup bruă hăng 38 boh tơhnal hơmâo: grup mă bruă git gai, ngă tui hơdră bruă; grup gơnong bruă ngă hmua, đang glai; grup bơwih ƀong sĭ mơdrô; grup gơnong bruă ia jrao; grup gơnong bruă pơtô pơjuăt hăng grup hơdră bruă djru mơnuih mơnam.

Amăng Jơnum khul pơlir hơbit mơnuih mă bruă Việt Nam hơmâo jao gơnam brơi 33 čô mơnuih mă bruă tơnap tap amăng tơring čar. Rĭm anung gơnam nua ñu 1 klăk prăk hăng 200 rơbâo prăk brơi tơl tơngan.