Amăng mông jơnum, ƀing khua mua lăng, tết Quý Mão thun 2023 pơphun hăng pran jua mơ-ak mơ-ai, pơđao pran jua, rơnuk rơnua, pơkrem. Tui anun, amăng bơyan čơkă thun phrâo bruă pơgang, pơgăn klin kman, khăm pơjrao; pơhlôm gơnam ƀong hơdjă hơmâo pơphun ngă tui khut khăt. Dong mơng lơ 20-26/1/2023, ƀu hơmâo hlơi măt gơnam ƀong huă. Ƀing mơnuih tui hơdră djru, mơnuih mă bruă mut phung, ƀing ƀun rin, hơdôm sang anŏ tơnap tap lêng kơ hơmâo arăng bơwih brơi tết, hăng abih tih mrô prăk djru bơyan tết ƀơi 63 boh tơring čar, ƀôn prong giăm 9.500 klai prăk hơmâo djru brơi 25 klăk čô mơnuih.

Bruă prap lui gơnam sĭ amăng bơyan tết hơmâo djop ƀon lan hăng anom bơwih ƀong sĭ mơdrô pok pơhai tañ hloh. Gơnam ba sĭ mơdrô lu djop mơta, nua huăi đĭ kơtang ôh; huăi ƀu kơƀah gơnam, đĭ nua, biă mă ñu lĕ ia săng, ia jâu. Apui lơtrik yua amăng bơyan ƀong tết hăng pơhlôm hơđong, rơnuk rơnua. Hơdôm bruă pơphun tui gru grua, bơrơguăt drơi jăn, tuai čuă ngui hăng pôr pơhing hơmâo pơphun djop mơta, klă mơ-ak hloh, ba glăi tơlơi yôm amăng gru grua.

Pơđut hĭ mông jơnum, Khua dêh čar ơi Phạm Minh Chính rơkâo djop ding jum, anom bruă, ƀon lan ječ ameč pơphun mă bruă, anăm brơi kaih bơbeč nao bruă bơwih ƀong sĭ mơdrô, hơdôm tơlơi bơwih ƀong huă-mơnuih mơnam; anăm pơphun hơdôm tal hyu ngui, hyu pơpŭ tết bơbeč nao bruă mă; gir run pơgiong bruă mơng akŏ thun kiăng pơgôp ngă pơgiong hơnong pơkă, bruă jao, akŏ bruă pơđĭ kyar bơwih ƀong huă-mơnuih mơnam thun 2023.