Lơ 17/1, ƀơi Ƀirô Ping gah, Khul apăn bruă Ping gah dêh čar tal XIII hơmâo jơnum sem lăng hăng pơgôp hiăp ngă tui tơlơi kiăng pơdơi apăn bruă hăng pơdơi lơtret mơng ơi Nguyễn Xuân Phúc, Ding kơna Ding jum kơđi čar, Ding kơna Khul apăn bruă Ping gah tal XIII, Khua mir sir dêh čar Việt Nam, Khua Khul apăn bruă Ling tơhan, wai pơgang rơnuk rơnua rơwang thun 2021-2026. Lơ̆m ngă Khua dêh čar rơwang thun 2016-2021, ñu hơmâo lu tơlơi gir run amăng bruă git gai, wai lăng amăng bruă pơgang klin Covid-19, ba glăi tŭ yua prong prin.

Samơ̆, ñu gơgrong gah bruă kơđiu čar mơng sa čô mơnuih apăn akŏ lơ̆m brơi lu mơnuih apăn bruă, amăng anun hơmâo 2 čô kơ-iăng khua dêh čar, 3 čô khua ding jum ngă soh, ba truh kơđi prong; 2 čô Kơ-iăng khua dêh čar hơmâo rơkâo pơdơi bruă laih, 2 čô khua ding jum hăng ƀing apăn bruă hơmâo pơsir kơđi hình sự. Hluh rơđah tơlơi glăm ba ƀơi anăp Ping gah hăng mơnuih ƀon sang, ñu hơmâo mơ-it đĭ hră pơdơi apăn bruă, pơdơi ngă khua, pơdơi lơtret. Khul apăn bruă Ping gah tŭ ư brơi ơi Nguyễn Xuân Phúc pơdơi bruă, jao Ding jum kơđi čar git gai hơdôm anom bruă bơdjơ̆ nao pok pơhai ngă tui hơdôm hră pơ-ar tui tơlơi pơkă.