Pơhiăp pơđut mông jơnum, Khua git gai Ping gah dêh čar ơi Tô Lâm lăng yôm Khul pơphun gơnong glông, hơdôm anih anom bơdjơ̆ nao hơmâo gir run kơtang hloh kiăng pơgiong hơdôm bruă pơprong, ba glăi tŭ yua hăng hơdôm bruă mă phrâo, khut khăt, djơ̆ jơlan gah hăng tŏ tui hơdôm boh than pok pơhai tơlơi pơtrun mrô 18.

Yôm hloh lĕ hơdôm anom bruă, khul Ping gah gơnong glông, Kơnuk kơna, Khua pơ ala mơnuih ƀôn sang dêh čar hăng hơdôm khul grup kơđi čar-mơnuih mơnam ƀơi gơnong glông hơmâo ba jơlan hlâo, ječ ameč pok pơhai bruă pel ĕp, pơgiong bruă mă, bruă jao, dưm dăp bruă amăng lăm, pơgiong bruă jao hlâo hăng hơnong pơkă. Khua git gai Ping gah dêh čar ơi Tô Lâm rơkâo pơ anăp anai tŏ tui pơsit tong bruă dưm dăp, hơbot anih anom mă bruă ƀu djơ̆ kơnong ha wŏt, boh than ba glăi amăng hrơi blan rơgao yôm phăn biă mă samơ̆ anai lĕ rơwang blung a đôč, kiăng tŏ tui kơsem min, pơgiong kiăng anih anom mă bruă phrâo hơđong, ngă bruă tŭ yua, hrưn đĭ klă amăng bruă mă./.