Tui hăng Jơnum min djop djuai ania mơnuih mơnam dêh čar Việt Nam, thun 2022, kual djuai ania ƀiă dô̆ ƀơi hơdôm bôh tơring čar Dăp Kơdư phun ñu hơđong gah bruă kơđi čar, pơhlôm hơđong mơnuih mơnam. Hơdôm jơlan hơdră, rơwang bruă pioh kơ kual neh wa djuai ania ƀiă hăng kual čư̆ siăng ngă tui klă ba glăi bôh tơhnal; hơdôm jơlan hơdră hơđong tơlơi hơdip mơnuih mơnam, djru mơnuih ƀun rin dưi đing nao.

Pô pơ ala kơ mơnuih hmâo lu mơnuih hmư̆ tui, ƀing apăn bruă khul đăo ƀơi hơdôm bôh tơring čar Dăp Kơdư; hmâo gum pơhiăp, rơkâo đĭ lu tơlơi kah hăng: djru brơi mơnuih hmâo arăng hmư̆ tui lu, mơnuih apăn bruă plơi pla; bruă pơtô pơhrăm bruă mă kơ mơnuih mă bruă kual tơnap tap, djuai ania ƀiă; pơhlôm lŏn ngă đang hmua pioh neh wa pơđĭ kyar; pơđĭ prăk mă yua pioh pơlar bruă tuai čuă ngui plơi pla; jơlan gah pơgang dlai; hơdră ruah mơnuih djuai ania ƀiă nao mă bruă... Tơdơi kơ hmư̆ tơlơi gum pơhiăp mơng ƀing pơ ala, ơi Đỗ Văn Chiến - Khua Jơnum min djop djuai ania mơnuih mơnam dêh čar Việt Nam brơi thâo, Jơnum min djop djuai ania mơnuih mơnam dêh čar Việt Nam hrom hăng hơdôm ƀirô čih djă pioh abih bang tơlơi gum pơhiăp mơng pô pơ ala, hrom hăng anun čang rơmang, neh wa kual Dăp Kơdư gum hrom hơbit, gum hrom pơdŏng kual Dăp Kơdư jai hrơi pơđĭ kyar hloh./.