Jơnum dưi pơphun tui hơdră pơtum ƀơi anăp hăng pơƀuh online kơ ƀing pơ ataih, pơƀuh ƀô̆ mơta ƀơi 33 bit anih djop tơring čar, ƀôn prong pơhmư̆ hrŏm. Khua git gai pơ ala mơnuih ƀôn sang dêh čar lăi pơtong, rơwang bruă laih rơgao jing rơwang bruă yom phara biă mă mơ̆ng khul pơ ala mơnuih ƀôn sang djop gưl, lŏn ia ta khom bong ƀơi anăp hăng lu tơlơi tơnap tap, lông lăng aka ƀu hơmâo djơ̆ ôh: klin covid 19, tơlơi truh lŏn adai ngă, anŏ pơblih ayuh hyiăng răm ƀăm kơtang biă mă; tơlơi pơhing ƀơi lŏn tơnah pơblih hmar, tơnap tap biă mă.

Ping gah, kơnuk kơna hơmâo ngă hră pơtrun, pok pơhai lu jơlan hơdră phun yom kiăng pơblih anŏ pơhrui mă tơlơi pơđĭ kyar, pơblih yua mrô đơ đam dêh čar, pơblih bruă mă amăng kơnuk kơna, pơpha gưl mă bruă, pơpha tơlơi dưi hăng dăp glăi sang bruă kơnuk kơna. Lơ̆m anun, gah yŭ kơ tơlơi git gai, pơčrâo ba mơ̆ng gơnong dlông, khul pơ ala mơnuih ƀôn sang djop gưl hơmâo gir run găn rơgao hĭ tơlơi tơnap tap, ăt hơmâo pơtong rơđah tong ten tơlơi gơgrong ba tơlơi dưi kơtang mơ̆ng kơnuk kơna ƀơi plơi pla, pơ ala kơ tơlơi kiăng, hăng anŏ ngă pô mơ̆ng mơnuih ƀôn sang. Khă hnun, Khua git gai pơ ala mơnuih ƀôn sang dêh čar ăt lăi lĕ, lơ̆m pok pơhai hơbô̆ bruă kơnuk kơna dua gưl dŏ gun lu tơlơi tơnap tap, lông lăng: yua anih wai lăng prong rơhaih hloh, khul bruă mă či pơsir lu tui, bruă jao kiăng ngă kơtrâ̆o hloh; tơlơi thâo kiăo tui hăng bruă phrâo mơ̆ng ƀing khua mua, mơnuih apăn bruă aka ƀu hmao ôh, kơƀah hĭ; gơnam yua mă bruă, mă mok bơwih brơi kơ bruă mă aka ƀu djop. Ơi Trần Thanh Mẫn rơkâo khul pơ ala mơnuih ƀôn sang djop gưl khom gir run khut khăt hloh, pơblih tơlơi pơmin, pran jua kơ bruă mă, hơdră ngă phrâo, pơkra tơlơi phiăn djru pơblih tui bruă mă, ba yua boh thâo ia rơgơi, pơblih yua mrô, tơlơi pơmin ia rơgơi ană mơnuih pơjing rai, pơmut amăng bruă mă.