Mơng mơguah sing bring ƀơi plơi Tơ Drăh, să Bờ Ngoong, tơring čar Gia lai, ơi Rôr, djuai ania Bahnar, lăng nao đang kơphê amăng kơthul ia ling mơng mơguah. Ƀiă đôč mơnuih thâo, giăm ha thun hlâo anun, ñu hơmâo arăng jak iâu mut hrŏm grup arăng iâu lĕ “Bahnah Đêga Kon Kông”-grup yua ƀing ngă soh pơ tač rơngiao akŏ pơjing hluai tui tơlơi đăo kiăng pơčlah djop djuai ania. Ơi Rôr brơi thâo, yua aka thâo phe pho, mơ̆ ƀing arăng nao pơanur na nao, pơsur ngă tui hơdôm tơlơi sat anun ñu ngă tui. Tơdơi kơ lu wŏt hơmâo ƀing kông ang, jơnum min djop djuai ania, khul grup nao tơl sang pơtrut pơsur, pơblang brơi, kah ñu ƀơƀrư̆ thâo hơdôm bruă ngă soh hluai tui tơlơi đăo kiăng kơdong glăi kơnuk kơna. Ră anai ñu hơđong pran jua ngă đang hmua, pơđĭ kyar bơwih ƀong huă sang anŏ, răng kơđiăng hăng hơdôm tơlơi pơčut pơčao mơng ƀing ngă sat.

Gah tlôn tơlơi pơplih anun lĕ bruă gir run kơdong glăi hơ-et kret kruai mơng djop anih anom kơđi čar ƀơi ƀon lan. Anun ƀu djơ̆ kơnong lĕ bruă kơdong glăi tui bruă mă đôč ôh mơ̆, blung hlâo lĕ ba glăi pran đăo gơnang mơng mơnuih ƀôn sang.

Amăng hơdôm boh plơi pla kual ataih ƀơi Gia Lai, rup rap ƀing apăn bruă gah jơnum min djop djuai ania, kông ang să, khul mơnuih ngă hmua, khul hlăk ai…rĭm hrơi kiăo tui lăng amăng plơi pla jing tơlơi juăt ƀuh. Ƀing gơñu ƀong huă hrŏm, dŏ hrŏm, ngă bruă hrŏm hăng neh met wa; đing tơngia hmư̆ tơlơi kiăng, pơsir hĭ tơlơi tơnap tap, gir run pơtô pơblang kiăng mơnuih ƀôn sang hluh rơđah tơlơi pơčut pơčao mơng ƀing ngă soh. Ƀu hŭi jơlan ataih ayaih, lu mơnuih apăn bruă amăng plơi pla ăt kret kruai nao tơl rĭm boh sang anŏ, hluai tui hơdôm mông jơnum pơƀut amăng plơi pla kiăng pơtô pơblang brơi. Đa hơmâo mơnuih kiăng nao pơblang brơi rĭm blan, đa sui thun kah mơng pơplih tơlơi pơmĭn. Mơng pran ngă bruă tơpă sit, jê̆ giăm djru brơi neh met wa hluh rơđah, ƀing apăn bruă nao pơtô brơi ƀu djơ̆ kiăng ngă pơgô̆ ƀudah phak hơget ôh, mơ̆ kiăng pơhlôm hơđong amăng plơi pla.

Amăng bruă kơdong glăi anun, ƀing tha plơi, mơnuih arăng đăo gơnang arăng lăng kar hăng anih pơging brơi plơi pla. Tha plơi H’Mrik, mơnuih arăng đăo gơnang amăng să Biển Hồ, hơmâo neh met wa lăng kar hăng phun kyâo prong pơging brơi plơi pla mơng hơdôm tơlơi pơčut pơčao mơng “Tin lành Đêga” hăng hơdôm tơlơi đăo phrâo yua ƀing gah rơngiao akŏ pơjing.

Lu wŏt, ƀing sat ĕp jơlan tui nao jê̆, samơ̆ hăng tơlơi găn rơgao hăng pran răng kơđiăng, tha plơi H’Mrik ƀu djơ̆ kơnong dưi hơngah hĭ đôč ôh mơ̆ ăt gir run pơblang brơi mơnuih ƀôn sang anăm hmư̆ tui ƀing ngă sat anai. “Kâo mut hrŏm bruă ƀing tha plơi 23 thun anai laih. Kâo ăt ƀu thâo lu lơi samơ̆ kiăng gir run abih pran jua amăng bruă mă, hrŏm hăng Ping gah djru brơi mơnuih ƀôn sang, ba jơlan hlâo amăng bruă mă, kiăng čung ba neh met wa tui jơlan Ping gah, kơnuk kơna; kiăng hơmâo tơlơi hơdip trơi pơđao yâo mơ-ak. Abih bang mơnuih ƀôn sang amăng plơi pla hơdip trơi pơđao, pơdong sang prong rơhaih hăng hơmâo rơdêh đĭ. Truh ră anai, neh met wa amăng plơi pla kơnong kơ hmư̆ tui Ping gah, kơnuk kơna, huăi hmư̆ tui ƀing sat, anăm hmư̆ tui tơlơi pơčut pơčao. Ră anai, ƀing gơmơi kơnong kơ bơwih ƀong ngă đong hmua đôč kiăng pơđĭ kyar bơwih ƀong huă amăng sang anŏ, plơi pla.”

Ƀu djơ̆ kơnong lĕ anih gơnang nao, ƀing tha plơi kar hăng H’Mrik ăt tŏ tui pơtrut pran gum pơgôp amăng plơi pla. Lơm hơmâo sang anŏ tơnap tap, ñu pơtrut pơsur neh met wa djru brơi; lơm hơmâo tơlơi bơrơjah bơrơsao, ñu amra nao pơsir brơi; juh alum ƀing hlăk ai gir run bơwih ƀong huă, ngă tui tơlơi črâo trun mơng Ping gah, tơlơi phiăn mơng Kơnuk kơna. Yua ƀing mơnuih arăng đăo gơnang hluh rơđah, kiăng neh met wa anăm hmư̆ tui ƀing sat, blung hlâo plơi pla kiăng hơđong, tơlơi hơdip kiăng trơi pơđao.

Mơng tơlơi pơmĭn anun, hơdôm hơdră bruă pơhrŏ trun ƀun rin, man pơdong plơi pla phrâo, ruh pơkra glăi sang tơ̆i phŏ, tuh pơ alin dăng hyu hrĕ apui lơtrik, jơlan glông, sang hră, sang ia jrao…hơmâo gong gai djop gưl ƀơi Gia Lai pok pơhai khut khăt tơl djop plơi pla. Lơm tơlơi hơdip hơđong, neh met wa jai đăo gơnang nao Ping gah, kơnuk kơna, mơng anun ngă hơdôm tơlơi pơčut pơčao mơng ƀing ngă sat anăm hơngah hĭ, wŏt hăng ƀing mơnuih hlâo anun juăt hmư̆ tui.

Tui ơi Rahlan Chung, Khua Jơnum min mơnuih ƀon sang tơring čar Gia Lai, tơring čar glăk pok pơhai lu hơdră bruă djru brơi kiăng ƀing mơnuih tui jơlan soh sat anai dưi pơwot glăi hơdip mut hrŏm amăng plơi pla, ngă hơđong tơlơi hơdip mơda. “Amăng hrơi blan rơgao hơmâo tơlơi mut hrŏm mơng djop anih anom kơđi čar kiăng gum hrŏm pơsir hĭ bruă tơnap tap brơi ƀing mơnuih hlâo anun kiăo tui Fulro lơm pơwot glăi pơ plơi pla, hăng bruă črâo brơi, pơtô brơi, pơanur ƀing gơñu. Amăng tơring čar glăk ngă tui hơbô̆ bruă “Pơwot glăi pran đăo gơnang-pơhlôm hơđong amăng plơi pla” arăng lăng yôm yua kơ ñu ba glăi tŭ yua, djơ̆ tơlơi sit nik”.

Gah tlôn tơlơi pơplih hơđong amăng plơi pla ăt hơmâo pran tuh rơyuh mơng tơhan kông ang, ling tơhan, glăk ƀơƀrư̆ wai pơgang hơđong tơlơi hơdip brơi mơnuih ƀôn sang. Ling tơhan gum hrŏm mơnuih ƀôn sang pơđĭ kyar bơwih ƀong huă-mơnuih mơnam, gơgrong kiăo tui lăng tơlơi sit nik amăng ƀon lan, hơdôm bruă kơdong glăi hăng ƀing sat, bruă hluai tui tơlơi đăo kiăng pơčut ngă sat lêng hơmâo tơlơi dong yua mơng mơnuih ƀôn sang. Tui Đại tá Phạm Hữu Trường, kơ-iăng Khua kông ang tơring čar Gia Lai, lu mơnuih juăt hơmâo arăng plư kiăo tui tơlơi đăo phrâi, tơdơi anun kah mơng thâo tơlơi sat răm, laih anun pơwot glăi pơ plơi pla, jing ƀing mơnuih hơdip hiam klă.

“Sit biă ñu, mơng bruă kơdong glăi tơlơi sat răm hơmâo dưi iâu glăi sa, dua čô mơnuih, ƀing gơñu jing ƀing mơnuih djru mut hrŏm bruă wai pơgang rơnuk rơnua amăng abih bang mơnuih, pơsur lu mơnuih pơwot glăi tui tơlơi đăo hiam, pơgôp wai pơgang hơđong amăng plơi pla”.

Lơm ƀing sat ăt glăk ĕp jơlan pơčut ngă soh, kiăng wai pơgang hơđong amăng plơi pla kiăng hơmâo tơlơi gum tơngan hrŏm mơng djop anih anom kơđi čar, mơng tha plơi, mơnuih arăng đăo gơnang hăng mơng rĭm čô mơnuih. Bruă kơdong glăi ƀu kiăng phao kơtang samơ̆ ăt glêh tơnap, lăng pran đăo gơnang kiăng iâu glăi, lăng bruă pơđĭ kyar bơwih ƀong huă kiăng hơkrŭ pran đăo gơnang, lăng pran gum pơgôp kiăng pơkiăo đuăi tơlơi pơčut ngă soh. Hăng mơng tơlơi sit nik anun hơmâo pơƀuh brơi, lơm mơnuih ƀôn sang thâo rơđah bruă mă mơng ƀing sat, lơm Ping gah, gong gai hăng anom bruă bơdjơ̆ nao ngă djơ̆ pran mơnuih ƀôn sang, hơdôm tơlơi pơčut ngă pơčlah, hơdôm tơlơi đăo phrâo mah hơgŏm hiưm pă amra pơgăn hĭ mơtăm. Yua tơlơi hơđong amăng plơi pla kiăng wai pơgang blung hlâo mơng kiăng ba glăi pran đăo gơnang amăng mơnuih ƀôn sang./.