Amăng mông bơkơtuai, mơnuih ƀôn sang pơdah pran jua đăo kơnang hăng tơlơi git gai, črâo ba mơ̆ng khua tơring čar Lâm Đồng amăng hơdôm hrơi tơring čar bŏng glăi hăng lu tơlơi tơnap, tơlơi lông. Hrŏm hăng anun, čang rơmang tơring čar Lâm Đồng khom đing nao pơđĭ kyar pran kơtang amăng bruă tuai čuă ngui hăng đang hmua; pơtrut kơtang pơplih mrô, bơwih ƀong mrô; đing nao tuh pơplai pơkra jơlan nao rai, biă ñu hơdôm rơwang bruă jơlan đuăi hmar phun kah hăng Tân Phú – Bảo Lộc, Bảo Lộc – Liên Khương hăng Đà Lạt – Nha Trang pioh gêh gal amăng pơlir kual, amăng lăm kual, pơtrut bơwih ƀong – mơnuih mơnam pơđĭ kyar.

Khua Jơnum min mơnuih ƀôn sang tơring čar Lâm Đồng Trần Hồng Thái pơtŏng sit tơring čar Lâm Đồng glăk amăng rơwang pok prong jơlan pioh pơđĭ kyar, glăk pơsit pran pơkra jơlan đuăi hmar pok jơlan gah Dơnung, hơdôm ară jơlan tô nao rai kual Dap Kơdư, Ngŏ Dơnung dêh čar, Dơnung Tŏng Krah. Ơi Trần Hồng Thái brơi thâo, thun phrâo, tơring čar Lâm Đồng amra pơphun pơkra jơlan đuăi hmar. Hmâo jơlan nao rai phrâo hmâo tơlơi pơđĭ kyar kơtang. Amăng 2-3 thun pơ̆ anăp, tơring čar Lâm Đồng amra đing nao pơđĭ kyar jơlan nao rai.

Ăt amăng mông bơkơtuai mơn, Khua Jơnum min mơnuih ƀôn sang tơring čar Lâm Đồng hmâo lăi pơthâo nao rai hăng ƀing khua pơ ala mơnuih ƀôn sang kơ hơdôm hơdră bruă pơđĭ kyar măi mok, bruă sĭ blơi, wai lăng tuai čuă ngui, bruă đang hmua, mă yua măi mok yôm phrâo, pơplih mrô, pơtô pơhrăm mơnuih mă bruă, ngă pơhưč tuh pơplai, bơwih ƀong mơtah, anih anom dô̆, ia jrao, pơtô pơhrăm amăng hơdôm hrơi pơ̆ anăp mơ̆ng tơring čar.

Hrŏm hăng anun, mơnuih ƀôn sang ăt lăi nao mơn, rơkâo đĭ, rơkâo khua mua tơring čar Lâm Đồng kơtưn hloh dong bruă wai lăng kông ngăn glai klô – anih anom dô̆, pơtrut tañ rơnoh pơsir anih anom pioh mă yua lŏn, pơdŏng glăi plơi pla, đang hmua phrâo pioh kơ hơdôm rơwang bruă phun, pơđĭ kyar sang dô̆ mơnuih mơnam, pơsit hră pơ-ar tŭ yap pô mă yua lŏn drŏn...

Amăng anun, tơlơi pơkă kual yôl hăng pioh sui hrơi, ngă lui lơi đôč kông ngăn lŏn drŏn hăng ngă dŏng glăi pơđĭ kyar mơ̆ng tơring čar khom dưi pơtlaih tañ. Ơi Păng Ting Sin, dô̆ ƀơi tơring kual Lạc Dương, tơring glông Lạc Dương, tơring čar Lâm Đồng, lăi:

"Ƀơi tơring kual Lạc Dương ƀing gơmơi hmâo lu kual pơkă bơrơkua hăng pioh sui hrơi, hmâo kual pơkă pioh sui truh 20 thun laih, samơ̆ ƀing gơmơi ăt akă dưi pok pơhai mơn. Čang rơmang prong hloh mơ̆ng mơnuih ƀôn sang lĕ hơdôm tơlơi pơkă kual ƀu ba glăi bôh tơhnal, ƀu dưi ngă tui, anun yơh lui lơi, hăng tơdah hmâo kual pơkă thơ tâ̆o hloh khom pok pơhai mơtăm”.

Rơbêh kơ 20 tơlơi gum pơhiăp mơ̆ng ƀing khua pơ ala amăng mông bơkơtuai hmâo črâo tơbiă hơdôm tơlơi tơnap lơm pơkă kual lŏn čuah bơdjơ̆ nao tơlơi dưi mơ̆ng mơnuih ƀôn sang amăng bruă pơsit hră tŭ yap tơlơi dưi mă yua lŏn; kiăng hmâo tơlơi pơsit sui kơjăp pioh pơgang bôh tŭ yua kơ mơnuih rông rơmô mă ia tơsâo tơdơi kơ hmâo tơlơi ha rơtuh drơi rơmô brung ƀơi tơring čar djai yua kơ tlâ̆o jrao pơgang tơlơi ruă, pơkă kual bơrơkua, pơgang glai klô. Hrŏm hăng anun, ƀing khua pơ ala pơphô brơi kiăng đing nao pơđĭ kyar dua bruă hmâo anô̆ gal mơ̆ng Lâm Đồng lĕ tuai čuă ngui hăng bruă đang hmua, biă ñu bruă đang hmua mă yua măi mok phrâo, hơdeč hmar; pơtrut kơtang pơplih mrô.

Pơhiăp klah čun mông bơkơtuai, ơi Nguyễn Thái Học, Khua git gai Ping gah jăng jai tơring čar Lâm Đồng pơtŏng sit, khua tơring čar Lâm Đồng tơpă tŭ mă abih bang hơdôm tơlơi gum pơhiăp, rơkâo đĭ, gum pơhiăp mơ̆ng khua pơ ala hơdôm gưl mơnuih ƀôn sang. Hrŏm hăng anun pơkôl amra đing nao pơtlaih hơdôm tơlơi tơnap, tơlơi gun anai pioh pơtrut Lâm Đồng pơđĭ kyar abih bang, kơjăp phik.

“Kâo rơkâo Anom bruă Ping gah tơring čar gum hrŏm hăng Anom bruă Jơnum min mơnuih ƀôn sang tơring čar ruah mă djop tơlơi gum pơhiăp mơ̆ng ƀing khua pơ ala mơnuih ƀôn sang hăng lăi pơthâo kơ hơdôm gơnong bruă, anom bruă, hơdôm tơring glông, plơi prong hmâo bruă gơgrong pel ĕp pơsir, lăi pơthâo glăi bôh tơhnal kơ Ping gah tơring čar. Hmâo hơdôm bruă gah pô dưi mơ̆ng khua tơring čar lĕ amra pel ĕp pơsir, bruă hơpă gah pô dưi mơ̆ng dêh čar lĕ tơring čar amra rơkâo đĭ”.

Khua git gai Ping gah jăng jai tơring čar Lâm Đồng ơi Nguyễn Thái Học pơtŏng sit pơkôl kơjăp biă mơ̆ng Ping gah tơring čar, Grŭp apăn bruă Ping gah tơring čar gir run gum hrŏm hơbit, pơsit pran, abih pran jua yua kơ tơlơi pơđĭ kyar mơ̆ng Lâm Đồng; mă bruă hmâo tơlơi gơgrong, lăng tơpă, ƀu hmâo pơmin mă ha jăn hăng pơdah rơđah; khom pơplih hĭ hơdôm mơnuih apăn bruă ngă gun tơlơi pơđĭ kyar mơ̆ng tơring čar./.