Kơ-iăng khua dêh čar lăi  pơtong, hơdôm tơlơi pơhing lăi pơthâo tơlơi kiăng kơtang mơ̆ng Việt Nam, sa tơlơi gir run pơblih phrâo kơtang amăng tơlơi pơmin, man pơdong, ngă pơgiong hơdră git gai wai lăng kơnuk kơna amăng tơlơi bơwih ƀong huă, kơđi čar, gru grua hiam, mơnuih mơnam, anih dŏ jum dar; râo pơdưh anŏ gêh găl hăng tơlơi hơmâo laih hlâo kiăng pơjing pran kơtang pơtrut pioh pơđĭ kyar hmar hăng hơđong kơjăp kơ lŏn ia, ngă tui djơ̆ tơhnal pơkă lŏn ia pơđĭ kyar amăng rơnuk hrưn đĭ mă pô.

Việt Nam sơ̆n pran jua kiăo tui jơlan hơdră pơtom hiăp mơ-ai pô, ngă pô sit nik, gum hrŏm lu bơnah, lu hơdră;  jing gơyut gơyâo hiam klă, bơnah ngă hrŏm lăp đăo kơnang, jing ding kơna hur har biă mă, glăm ba amăng khul gum hơbit ƀơi jar kmar. Kơ-iăng khua dêh čar iâu pơthưr djop sang bruă mơdrô, ƀing tuh pơ alin mơ̆ng dêh čar UAE, kual Trung Đông hăng hơdôm dêh čar pơkŏn tuh pơ alin pơ Việt Nam ră anai ngă tui anŏ pơblih phrâo hơdjă mơtah mơda, pơblih phrâo tơlơi pơčeh ia rơgơi, boh thâo phrâo rơgơi AI, pơkra hrĕ pơkĕ yua măi mok añĕ, ba yua apui lơtrik hơdjă.