Tlam lơ 13/1, ƀơi anom bruă kơnuk kơna, ding kơna khul git gai ping gah, Kơ-iăng Khua dêh čar ơi Lê Minh Khái, tŭ jum ơi Park Hark Kyu, Khua phun group Samsung Electronics wai lăng gah prăk kăk hlăk rai čuă jơmư hăng mă bruă ƀơi dêh čar ta. Ƀơi mông tŭ jum, ơi Lê Minh Khái lăi pơtong, tơlơi ngă giăng mah Việt Nam hăng Hàn Quốc hơmâo lu tơlơi pơblih klă hiam hăng hlăk amăng črăn pơđĭ kyar klă.

Hàn Quốc jing bơnah ngă hrom yôm hăng Việt Nam, biă mă ñu tơlơi bơwih ƀon ghuă, sĭ mơdrô hăng tuh pơ alin. Anai ăt jing tơlơi gêh găl pioh kơ Samsung ăt kah hăng lu sang bruă sĭ mơdrô mơ̆ng Hàn Quốc pok prong tuh pơ alin ƀơi Việt Nam amăng hrơi blan pơ anăp. Khua git gai Samsung brơi thâo ñu pô hơmâo 20 wơ̆t laih rai pơ Việt Nam hơduah ĕp anih anom sĭ mơdrô, amăng anun ñu tuh pơ alin man pơdong sang măi mơ̆ng Samsung ƀơi Thái Nguyên. Khua git gai phun Samsung brơi thâo: Samsung ăt iâu pơthưr djop kông ty pơkra ming tivi, gơnam yua hăng điện tử, ăt tuh pơ alin rai pơ Việt Nam thun blan pơ anăp.