Anai jing tal blung a hơmâo ngă lơphet pơpŭ bơni kơ ƀing đah kơmơi rơgơi bruă gah ia jrao hơmâo pơphun, đah mơng hơdor lui hơdôm tơlơi gum pơgôp prong hăng tŭ yua mơng ƀing rơgơi mơbruă pơđĭ kyar bơwih ƀong huă - mơnuih mơnam laih anun bruă pơgang klin Covid-19.

Amăng mrô 51 čô đah kơmơi rơgơi mơbruă gah ia jrao hơmâo pơpŭ bơni tal anai, hơmâo 1 čô nai tha prin, 15 čô Kơ-iăng nai tha prin, 17 čô nai prin tha, 9 čô thạc sỹ, 1 čô điều dưỡng. Pơhiăp ƀơi mông ngă lơphet, Kơ-iăng khua dêh čar ơi Trần Hồng Hà lăng yôm tơlơi gum djru wai lăng tơlơi suaih pral kơ mơnuih ƀon sang mơng ƀing đah kơmơi ngă bruă gah ia jrao lăi hrŏm hăng 51 čô hơmâo pơpŭ tal anai. Biă ñu, amăng rơbêh 3 thun rơgao pơgang klin Covid-19, lu đah kơmơi rơgơi mơbruă hơmâo gum djru, kơsem min boh thâo, tap năng ƀu hŭi kơ glêh tơnap, hŭi rơhyưt ôh, mut nao pơ anih hơmâo klin djru brơi, gum pơmin hơdră pơgang klin, mơng anun dưi pơgang klin tŭ yua.