Čơkă yă Marisa Lago rai čuă Việt Nam, kơ-iăng Khua dêh čar ơi Trần Lưu Quang pơsit tong, Việt Nam čang rơmang pơtrut tơlơi rô nao rai kơplah wah dua boh dêh čar jai hrơi sit nik, djop mơta ƀiă dong. Kơ-iăng Khua dêh čar rơkâo Kơ-iăng Khua ding jum sĭ mơdrô Mi Marisa Lago djru tô nao rai hăng hơdôm anom bruă tuh pơ alin dêh čar Mi, sit biă ñu lĕ amăng bruă boh thâo măi mok, gơnam măi mok pơkra rơdêh por, rai tuh pơ alin pơ Việt Nam; rơkâo dua bơnah sem lăng bruă ngă hrŏm amăng hơdôm bruă pơlăi nao rai tơlơi găn rơgao, pôr pơhing, hơdră bruă bơdjơ̆ nao pơtrut pơplih mă yua boh thâo phrâo, tơlơi thâo thăi hăng yua boh thâo phrâo brơi mơnuih mă bruă amăng hơdôm bruă čar hăng hơjăn.

Kơ-iăng Khua dêh čar pơsit tong Việt Nam amra gơgrong ngă hrŏm hăng Mi kiăng pơsir hĭ hơdôm bruă dua bơnah đing nao, tŏ tui tơlơi rô nao rai sĭ mơdrô hơđong, anăp nao hơnong pơkă sĭ mơdrô bơkơnar, hơđong kjăp, ba glăi tơlơi dưi hrŏm.