Amăng mông bơkơtuai, dua bơnah pơdah tơlơi mơ-ak ƀơi anăp hơdôm yak pơđĭ kyar anô̆ klă mơ̆ng tơlơi rô nao rai Việt Nam – Japan, hăng gru pơđom gru grua lĕ bruă dua bôh dêh čar pơđĭ tui tơlơi rô nao rai gum hrŏm abih bang amăng blan 11/2023 hăng pơphun rơbêh kơ 500 mơta bruă mă hơdor glăi 50 thun hrơi akô̆ pơjing bruă pơtom hiăp.

Kơ-iăng Khua dêh čar rơkâo Khua pơ ala mơnuih ƀôn sang dêh čar Japan dŏng yua dua bôh dêh čar kơtưn pơkĕ hrŏm mơnuih mă bruă, gum hrŏm gah mơnuih mă bruă; hmâo hơdôm hơdră bruă djru mơnuih Việt Nam glăk dô̆ hơdip mơda, hrăm bruă hăng mă bruă ƀơi Japan. Khua gơnong yŭ Khua pơ ala mơnuih ƀôn sang Nukaga lăi pơthâo Gong gai dêh čar Japan amra hmâo hơdră bruă pơđĭ dlông tơlơi kiăng hơdip hăng mă bruă kơ mơnuih mă bruă Việt Nam ƀơi Japan amăng hơdôm hrơi prăk yên rơngiă nua; čang rơmang khua pơ ala mơnuih ƀôn sang dua bôh dêh čar gum hrŏm amăng hơdôm tơlơi jar kơmar dua bơnah hơdai bơđing nao./.