Kơ-iăng Khua mir sir dêh čar ta yă Võ Thị Ánh Xuân lăi rơđah, Việt Nam lăng UNICEF kah hăng sa bơnah gum hrŏm pơđĭ kyar yôm phăn biă, hmâo lu tơlơi gum hơgôp sit nik kơ bruă bơwih brơi, pơtô pơhrăm hăng pơgang ba čơđai muai Việt Nam amăng lu thun rơgao. Kơ-iăng Khua mir sir dêh čar ta brơi thâo, bruă bơwih brơi, pơgang hăng pơtô juăt čơđai muai lĕ đing nao hlâo amăng hơdră bruă pơđĭ kyar mơ̆ng Việt Nam.

Čang rơmang pơ̆ anăp anai UNICEF kơtưn iâo pơhrui ngăn rơnoh djru bruă pơgang hăng bơwih brơi čơđai muai Việt Nam, ngă tui hơdôm Tơhnal ba tơbiă pơđĭ kyar kơjăp phik bơdjơ̆ nao čơđai muai, biă ñu bruă pơtô pơhrăm, bơwih brơi tơlơi suaih pral kơ čơđai, gơnam ngă bơbuă kơ čơđai, djru vaccine kơ Jơlan hơdră tlâ̆o pơgang hlôm hlâo pơhư prong, pơhlôm dưm kơnar bơnai hăng rơkơi./.