Ƀơi anăp Gong kut Wa Hồ hăng djŏp djuai ania kual Dap Kơdư ƀơi Tơdron lăk Đại Đoàn Kết, Kơ-iăng khua mir sir yă Võ Thị Ánh Xuân hrŏm hăng khua mua dưm bơnga, kŭp akŏ hơ-ŭ, hơdor bơni kơ Khua mir sir Hồ Chí Minh - sa čô khua git gai rơgơi mơbruă mơ̆ng Ping gah ta, Tơhan sông kơtang pơklaih rơngai djuai ania, Tơhan Cộng sản jar kmar ba gru nao hlâo.

Grup mă bruă nao tŭi ñang ƀơi pra yang hơdor kơ Wa Hồ amăng tơdron lăk. Lơ̆m nao pơ Pơsat tơhan djai pơsăn drơi tơring čar Gia Lai, Kơ-iăng khua mir sir yă Võ Thị Ánh Xuân hrŏm hăng ƀing khua pioh mông hơ-ŭ, pơpŭ bơni, hơdor kơ tơlơi gum djru prong prin mơ̆ng tơhan sông kơtang djai pơsăn drơi kơ lŏn ia.