Găn rơgao 35 thun akŏ pơdong, kơtưn gir hăng đĭ rai prong anom bruă anai jing anih kơsem min boh thâo ia rơgơi hăng lu mơta bruă mă gah nhiệt đới, hmư̆ hing ƀơi Việt Nam, dêh čar Nga hăng rŏng lŏn tơnah. Boh tơhnal kơsem min mơ̆ng Anom bruă anai hơmâo djru hrom yôm pơđĭ kyar boh thâo ia rơgơi phrâo lăi hrom, gah boh thâo ia rơgơi, mơneč ling tơhan ăt hnun mơ̆n, bơwih brơi kơ boh tŭ yua gah bruă mă ling tơhan, pơgang lŏn tơnah laih anun pơđĭ kyar bơwih ƀong huă mơnuih mơnam lŏn ia, kiăng djop anŏ kiăng mơ̆ng Việt Nam hăng dêh čar Nga.

Pơhiăp ƀơi mông jơnum, pơ ala kơ khua mua kơnuk kơna, Kơ-iăng khua mir sir yă Võ Thị Ánh Xuân bơni hơ-ơč kơ boh tơhnal, gru grua dưi ngă mơ̆ng Anom bruă Nhiệt đới Việt-Nga dưi ngă laih thun blan rơgao 35 thun pơ klôn adih; čang rơmang hăng đăo kơnang lĕ, Anom bruă Nhiệt đới Việt-Nga amra pơđĭ tui bruă ngă tơlơi gum pơgôp, gum hrom hăng hơdôm boh tơhnal dưi ngă, pơđĭ tui tơlơi thâo amăng bruă git gai, pran kơtang blah ngă mơ̆ng djop sang bruă ping gah, anom bruă wai lăng, git gai ƀing ling tơhan; lăi pơthâo, rơkâo đĭ hơdră mă bruă tong ten hloh kiăng kơtưn, pok pơhư prong bruă ngă hrom, pơđĭ tui boh tŭ yua amăng bruă mă, bơwih brơi bruă mă gah ling tơhan, pơgang lŏn ia hăng pơđĭ kyar bơwih ƀong huă mơnuih mơnam dêh čar dua bơnah.