Kiăng kơ lăi pơthâo, pơlir bruă hơduah ĕp bruă mă; ngă gêh gal kiăng abih bang mơnuih, hlăk ai tañ thâo djop, hmao tlôn tơlơi pơhing bruă mă mơng anun dưi ruah mă bruă lăp djơ̆ hăng pran hor, lơ 17/5, ƀơi plơi prong Kon Tum, gơnong bruă mă, tơhan rơka hăng mơnuih mơnam gum hrŏm hăng khul hlăk ai tơring čar Kon Tum pơphun hrơi hơduah ĕp bruă mă thun 2023 pơhưč lu mơnuih glăk kiăng bruă mă.

Amăng hrơi hơduah ĕp bruă mă ƀơi Kon Tum thun 2023 hơmâo 37 anih anom nao ĕp mơnuih mă bruă hăng rơbêh 3.200 anih mă bruă amăng tơring čar, gah rơngiao tơring čar hăng nao mă bruă tui thun blan pơkôl pơ dêh čar tač rơngiao. 12 anih anom nao ĕp mơnuih mă bruă amăng hrơi hơduah ĕp bruă mă lêng anom bruă arăng đăo gơnang, bơwih ƀong sĭ mơdrô hơđong, hơmâo prăk apah hăng hơdră djru brơi mơnuih mă bruă klă hloh.

Amăng hrơi hơduah ĕp bruă mă tơring čar Kon Tum thun 2023, hơdôm anih anom glăk hyu ĕp mơnuih mă bruă hơmâo čơkă, lăi pơthâo, črâo brơi bruă mă kơ giăm 700 čô mơnuih, ƀing hlăk ai. Tơring čar Kon Tum ba tơbiă hơnong pơkă amăng thun 2023 ĕp brơi bruă mă kơ rơbêh 6.000 čô mơnuih, amăng anun hơmâo 100 čô mơnuih nao mă bruă pơ tač rơngiao.