Akŏ bruă rông un sĭ čuh hơtă mă yua boh thâo phrâo hăng pla phun kyâo djop pơjeh glăk hơmâo kông ti pơčruh ngăn Thiên Thành Tài pok pơhai ƀơi plơi Khơk Klong, să giăm guai Rờ Kơi, tơring glông Sa Thầy, tơring čar Kon Tum. Tui khua mua kông ti anai, akŏ bruă anai hơmâo ngă tui amăng đơ đam rơbêh 21 ektar, abih tih prăk tuh pơ alin lĕ 165 klai prăk. Hơnong pơkă mơng akŏ bruă anai lĕ rĭm thun rông un 2 tal hăng abih tih 48.000 drơi. Hrŏm hăng anun lĕ pơsir hĭ eh, ia mơañă hlô rông, pla djop pơjeh hăng pơhrui him lăng rĭm thun giăm 300 klai prăk hăng hơmâo lu dong bruă mă brơi giăm 100 čô mơnuih. Ơi Phạm Văn Thành, Khua khul wai lăng kông ti pơčruh ngăn Thiên Thành Tài brơi thâo, amăng hrơi blan pok pơhai, kông ti hơmâo tơlơi gum djru mơng gong gai hăng gơnong bruă bơdjơ̆ nao amăng tơring čar Kon Tum.

“Ƀing gơmơi pơsit tuh pơ alin amăng hrơi blan anai hơmâo tơlơi gum djru abih pran jua mơng Jơnum min mơnuih ƀon sang tơring čar Kon Tum kah hăng Jơnum min mơnuih ƀon sang tơring glông Sa Thầy ngă gêh gal kơ kông ti amăng hrơi blan krăo lăng, ruah anih man pơkra drông war kah hăng bruă pơhrui glăi lŏn mơnai. Dua dong lĕ djop gơnong bruă, anom bruă ăt ngă gêh gal brơi kông ti lơ̆m ngă hră pơ-ar kiăng kông ti dưi pok pơhai tañ hloh”.

Kiăng pơhưč anom bruă tuh pơ alin, ngă gêh gal pơđĭ kyar bơwih ƀong huă-mơnuih mơnam, tơdơi kơ Jơnum Ping gah tơring čar Kon Tum tal XVI amăng blan 9/2020, tơring čar Kon Tum đing nao pơplih ngă gêh gal tuh pơ alin, kơtưn lăi pơthâo kơ hơdôm akŏ bruă jak iâu tuh pơ alin hăng amra gum hrŏm hăng hơdôm anom bơwih ƀong sĭ mơdrô. Kiăng pơplih, pơsir hĭ hmao tlôn hơdôm tơlơi gun găn mơng anom bruă tuh pơ alin, Jơnum min mơnuih ƀon sang tơring čar Kon Tum hơmâo tŏ tui jơlan hơdră “kơphê anom bơwih ƀong sĭ mơdrô, ƀing bơwih ƀong sĭ mơdrô” amăng tong krah rĭm blan; pơphun “Jơnum pơlăi nao rai hăng anom bơwih ƀong sĭ mơdrô” ha thun 2 wŏt. Hrŏm hăng tơring čar, ƀơi 2 kual pơtrut bơwih ƀong, gong gai plơi prong Kon Tum hăng tơring glông Kon Plông ăt pơphun na nao mông pơbưp, pơlăi nao rai, djru anom bơwih ƀong sĭ mơdrô nao pel ĕp tơlơi dưi tuh pơ alin kah hăng bruă bơwih ƀong, sĭ mơdrô. Ơi Nguyễn Thanh Mân, Khua Jơnum min mơnuih ƀon sang plơi prong Kon Tum brơi thâo:

“Lơ̆m hơdôm anom bruă tuh pơ alin nao kơsem min, plơi prong amra jing gong jơlan kiăng pơƀut glăi djop mơta bruă mơ̆ hơdôm anom bruă tuh pơ alin đing nao, anai lĕ lăi pơthâo kual lŏn mơnai, lăi pơthâo bruă ngă hră pơ-ar. Plơi prong hrŏm hăng hơdôm gơnong bruă, anom bruă gơgrong pơphô bruă brơi Jơnum min mơnuih ƀon sang tơring čar ngă gêh gal hloh brơi kơ anom bruă tuh pơ alin. Tơdah anom bruă tuh pơ alin bưp tơnap tap, plơi prong amra lĕ mơnuih gơgrong pơsir hĭ mơ̆ ƀu brơi anom bruă tuh pơ alin hyu hơduah ĕp mă ôh”.

Hăng lu hơdră pơplih phrâo, tơdơi rơbêh 2 thun pok pơhai ngă tui tơlơi pơtrun mơng Jơnum Ping gah tơring čar XVI, Kon Tum hơmâo pơhưč 68 akŏ bruă tuh pơ alin hăng abih tih prăk tuh pơ alin lĕ 18.000 klai prăk. Sit biă ñu ƀu djơ̆ kơnong ƀơi hơdôm kual gêh gal đôč ôh, mơ̆ ƀơi hơdôm tơring glông kual ataih, kual mơnuih djuai ania ƀiă dŏ lu tơnap tap anun lĕ Tu Mơ Rông, Đăk Tô, Sa Thầy…ăt pơhưč anom bruă tuh pơ alin hăng lu akŏ bruă hơmâo pok pơhai amăng kual. Yă Huỳnh Thị Thúy Hà, Kơ-iăng khua gơnong kơčăo bruă hăng tuh pơ alin tơring čar Kon Tum brơi thâo, tơring čar glăk tŏ tui jak iâu hơdôm anom bruă tuh pơ alin hăng djop mơta bruă anun lĕ: pơkra akhan kyâo; tuh tia pơkra pơjing; apui lơtrik pơkra glăi; tuai čuă ngui; ngă hmua yua boh thâo phrâo…Hăng kiăng Kon Tum jing anih tuh pơ alin, tơring čar glăk gir run pơplih ngă gêh gal tuh pơ alin bơwih ƀong sĭ mơdrô:

“Tơring čar pơsit tong bruă pơplih ngă gêh gal tuh pơ alin bơwih ƀong sĭ mơdrô, djru brơi anom bơwih ƀong sĭ mơdrô lĕ bruă akŏ phun kiăng pơhưč tuh pơ alin, pơđĭ kyar bơwih ƀong huă-mơnuih mơnam amăng tơring čar. Tơring čar đing nao pơtrut pơplih ngă hră pơ-ar. Djop gưl, gơnong bruă pơtrut pơsir hĭ bruă ngă pơ-ar hăng hơdôm akŏ bruă hơmâo laih anom bruă tuh pơ alin kiăng hơdôm anom bơwih ƀong sĭ mơdrô tañ pok pơhai bruă mă hmao tlôn hăng tŭ yua. Đing nao ngă gêh gal kiăng pơhưč hơdôm anom bruă tuh pơ alin pơprong, kjăp bruă, hăng abih pran hăng tơring čar”.

Kiăng kơ bruă tuh pơ alin bơkơnar, tơpă sit, djơ̆ tơlơi phiăn, tơring čar Kon Tum ră anai glăk gir run pơsir hĭ hơdôm anŏ aka ƀu klă ƀơi hơdôm akŏ bruă mơ̆ anom bruă tuh pơ alin ƀu dưi ngă djơ̆ hăng tơlơi ƀuăn. Laih dong gir run pơsir hĭ khut khăt ƀing mơnuih, khul grup ngă glêh tơnap amăng hrơi blan anom bruă tuh pơ alin nao pel ĕp, sem lăng hăng tuh pơ alin amăng tơring čar.