Ƀơi ƀôn prong Hồ Chí Minh, Khua git gai Ping gah Cộng sản Việt Nam ơi Tô Lâm hơmâo mông bưp hăng Khua git gai Ping gah mơnuih ƀôn sang Kur, Khua git gai pơ ala mơnuih ƀôn sang gơnong glông dêh čar Kur ơi Hun Sen hăng Khua git gai Ping gah mơnuih ƀôn sang Lao, Khua mir sir dêh čar Lao ơi Thongloun Sisoulith. Amăng mông bưp, lơm bruă amăng kual hăng rŏng lŏn tơnah hơmâo lu tơlơi pơplih phrâo, ƀu hmao thâo, tlâo bơnah tŭ ư tŏ tui ngă dơlăm, djop mơta hăng pok prong ƀiă dong tơlơi rô nao rai kơplah wah tlâo Ping gah, tlâo kơnuk kơna, kjăp tui pran đăo gơnang kơđi čar hăng tơlơi rô nao rai kơplah wah khua mua; ƀuă tŏ tui gru grua gum pơgôp pơlir hơbit kơplah wah tlâo boh dêh čar, lăng anai lĕ kông ngăn yôm phăn, anai lĕ tơlơi yak nao kiăng hloh amăng bruă pơgang rơnuk rơnua, hơđong hăng pơđĭ kyar ƀơi rĭm boh dêh čar; sit biă ñu tŏ tui hăng kơtưn ƀiă dong amăng bruă pơtô pơblang, pơtô pơjuăt kiăng djop rơnuk mơng tlâo boh dêh čar, sit biă ñu rơnuk hlăk ai čơđai hluh rơđah hăng hơdor gru grua gum pơgôp pơlir hơbit.

Tlâo čô khua tŭ ư ngă tui tŭ yua hơdôm hơdră bruă ngă hrŏm tui ră anai, tŏ tui pơlăi nao rai, ĕp hơdră phrâo kiăng ngă hrŏm jai hrơi klă, tŭ yua, sit nik, yua tơlơi dưi mơng rĭm boh dêh čar hăng tơlơi dưi hrŏm mơng mơnuih ƀôn sang tlâo boh dêh čar, yua kơ tơlơi rơnuk rơnua, hơđong, ngă hrŏm hăng pơđĭ kyar amăng kual hăng rŏng lŏn tơnah.