Ring bruă dưi pơpha ngă 3 rơwang bruă, amăng anun tơring čar Daklak lĕ ƀirô pô ngă tui rơwang črăn bruă mrô 3, ataih 48,5 km, prăk mă yua 6.485 klai prăk. Amăng hơdôm bôh tơring glông mơng tơring čar Daklak hmâo rơwang bruă găn nao, Krông Pač hmâo mrô sang anô̆ hăng lŏn mă yua lu hloh hăng truh mông anai lĕ jing tơring glông blung a ngă giong bruă pel ĕp, pơkă čơkă mă yua anih anom pơkra jơlan pok pơhai rơwang bruă.

Sang anô̆ ơi Hoàng Trung Thành hmâo 8 ar lŏn pla kơ phê plah nao rai sầu riêng ƀơi krah plơi Tân Sơn, să Ea Yông. Kual hmua anai hmâo ha mơkrah kual Rơwang bruă pơkra jơlan đuăi hmar Khánh Hoà – Buôn Ma Thuột găn nao. Ñu lăi pơthâo, dưi thâo tơlơi pơhing rơbêh kơ 4 ar đang hmua mơng sang anô̆ gah kual mă yua pơkra jơlan lĕ amra prăp lui laih, yua kơ anai lĕ hơdră pơtrun mơng Ping gah, Kơnuk kơna. Jơlan pơjing amra djru klă pơđĭ kyar bơwih ƀong – mơnuih mơnam ƀu djơ̆ kơnong kơ tơring glông Krông Pač ôh mơ̆ abih bang tơring čar Daklak đa lĕ đơ đam kual Dăp Kơdư dong. Krah thun 2022, mơnuih apăn bruă lŏn drŏn hmâo nao hlă pŏng guai, hăng truh giăm Tết tui phiăn juăt thun 2023 phrâo rơgao lĕ pơphun pơkă, jŭ yap hăng ngă hră yap akô̆ bruă pioh pok pơhai hơdôm yak tô̆ tui pơ ala glăi lŏn mă yua pơkra jơlan. Ơi Hoàng Trung Thành lăi:

 “Ƀing apăn bruă jŭ yap lăi pơthâo kơ mơnuih ƀôn sang, ƀing gơmơi ba gơñu nao pơ̆ anih anom lŏn hmâo mă yua kơ rơwang bruă, gơñu dăng hrĕ pơkă mơng akô̆ truh kơ rơnuč, yap phun kyâu pioh pơ ala glăi. Hơdôm bơnah gum hrom pơkă, jŭ yap hrom hăng sang anô̆ ƀuh djơ̆ hơđong lĕ tŭ ư hrom”.

Ƀơi plơi Tân Sơn, să Ea Yông, sang anô̆ ơi Lê Đình Thiên ăt hmâo laih 4 ar lŏn pla kơ phê plah nao tiu, gah kual lŏn mă 1/4 pơkra rơwang bruă. Ơi Thiên brơi thâo, hơdră pơtrun mơng Ping gah hăng Kơnuk kơna lĕ sang anô̆ tŭ ư yơh. Ñu kơnong kơ čang rơmang bruă pơ ala glăi ngă tui tơpă rơđah, bĕ rơngiă đôč kơ mơnuih ƀôn sang. Ơi Lê Đình Thiên lăi đĭ tơlơi pơmin:

 “Bơhmutu ñu amăng plơi lĕ lu anih ră anai mơng 500 – 600 klăk prăk lom sa ar, anun lĕ yua kơ đang gơñu hmâo lu phun sầu riêng; lu anih phun tiu, kơ phê nua ñu ƀu lu lĕ 300 – 400 klăk prăk sa ar. Jơlan đuăi hmar mơ̆ pơ ala glăi thơ lăi lăp djơ̆ lĕ tơnap biă, samơ̆ neh wa kơnong kơ dưm dưm hăng nua pơkă sĭ ră anai, ƀudah hmâo ƀiă hloh ăt khom hmâo mơn 70-80% lĕ mơnuih ƀôn sang ƀing gơmơi tŭ ư biă”.

Să Ea Yông, tơring glông Krông Pač hmâo 193 blah đang hmua mơng 107 bôh sang anô̆ hăng sa dua anih anom jơnum khul đăo dŏ măng Rơwang bruă pơkra jơlan đuăi hmar Khánh Hoà – Buôn Ma Thuột. Abih bang kual lŏn mă yua pơkra jơlan lĕ 250.672 m2. Ơi Nguyễn Phụng Minh – Khua Jơnum min mơnuih ƀôn sang să brơi thâo, ră anai hmâo laih 192/193 mrô dưi pơkă jŭ yap giong, bruă pel ĕp yap ăt kah hăng giăm giong mơn; grŭp jŭ yap ăt glăk jao mơn hră kơ Anom pơlar lŏn tơring glông Krông Pač kiăng pơphun pơdŏng hơdôm rơwang bruă pơ ala glăi lŏn mă yua pơkra jơlan.

 “Ƀing gơmơi jao abih bang hră pơ-ar bơdjơ̆ nao kơ Anom pơlar lŏn tơring glông. Mơng anun, sa dua mơta anih anom amra mă yua nua hăng čih pơkra hră pơ-ar brơi glăi kơ să phuă hĭ lăi pơdah tal sa, rơkâo neh wa tơbiă lăng. Tơdah sang anô̆ hơpă akă tŭ ư tal sa, ƀing gơmơi tŭ mă lăi pơthâo glăi kơ tơring glông kiăng gơñu pơplih pơkra, tơdơi kơ anun phuă hĭ tal 2. Hăng lom phuă tal 2 mơ̆ neh wa tŭ ư ƀu dô̆ gum pơhiăp hơget dong thơ, pơsit tal 3 amra jak iâu neh wa nao mă prăk”.

Rơwang bruă pơkra jơlan đuăi hmar Khánh Hoà – Buôn Ma Thuột hmâo rơwang ataih giăm truh 118 km, găn 4 bôh tơring glông mơng tơring čar Daklak anun lĕ: Krông Pač, Krông Bông, Ea Kar hăng Mdrak laih anun plơi prong Ninh Hòa mơng tơring čar Khánh Hòa. Amăng anun kơnong kơ ƀơi tơring glông Krông Pač hmâo rơwang ataih hloh hăng rơbêh kơ 33 km, găn 8 bôh să lĕ: Hòa Đông, Ea Knuê̆č, Ea Yông, Ea Kênh, Hòa Tiến, Tân Tiến, Ea Uy hăng Vụ Bổn. Abih bang kual lŏn mă pơhrui mă pơkra jơlan rơbêh kơ 200 ektar hăng năng ai ñu 200 ektar rơwang guai kơtuai jơlan pơkra mơng rơbêh kơ 1.000 bôh sang anô̆ mơnuih ƀôn sang hăng sa dua khul grŭp.

Yă Ngô Thị Minh Trinh – Kơ-iăng Khua Jơnum min mơnuih ƀôn sang tơring glông Krông Pač, ding kơna Khul pơ ala glăi lŏn yua pơkra jơlan tơring glông lăi pơhing, truh mông anai, tơring glông hmâo ngă giong laih giăm truh 2.000 mơta anăn, hmâo 98% kual lŏn kiăng mă yua; čih anăn 157/208 bôh sang anô̆ pơdŏng jơlan gah pơdŏng plơi hơđong; pơpha 16,5 ektar lŏn jing 3 kual plơi phrâo hơđong ƀơi hơdôm bôh să Tân Tiến, Vụ Bổn hăng Ea Knuê̆c. Tui hăng yă Trinh, kiăng bĕ bưp tơlơi “trung ƀung” amăng bruă pơ ala glăi lŏn mă yua pơkra mơ̆ lu rơwang bruă ha rơbâo klai prăk ƀơi Daklak glăk bưp, tơring glông amra ngă tui bruă anai tŏng ten, rơđah, pơdah tơpă, pơhlôm tơlơi dưi mơng mơnuih ƀôn sang.

 “Ƀing gơmơi gum hrom hăng anom bruă lăi pơthâo, pơphun pel ĕp truh rim kual lŏn ƀu djơ̆ tui kual ƀudah sa bôh să hrom tui anun mă yua nua. Hăng tơlơi kơjăp tui anun, kâo pơmin mơnuih ƀôn sang amra tŭ ư, yua kơ djơ̆. Ƀu djơ̆ ta ngă yua kơ tơlơi anai ôh, tơlơi adih ôh, djop mơnuih khom ngă hiưm hơpă kiăng pơhlôm lăp djơ̆ bôh tŭ yua mơng mơnuih ƀôn sang hăng Kơnuk kơna laih anun khom hluai tui pran jua pơkă mơng tơlơi phiăn pơkă”.

Hăng pran jua tañ, tơpă amăng bruă mă lŏn pơkra jơlan ƀu djơ̆ kơnong kơ ƀơi tơring glông Krông Pač ôh mơ̆, čang rơmang ring bruă amra dưi pơkra djơ̆ rơnoh bruă pơkă hlâo kơ lơ 30/6 pơ̆ anăp anai. Bơ̆ jơlan đuăi hmar Buôn Ma Thuột – Khánh Hòa tô nao rai anom kual Dăp Kơdư – Dơnung Trung Bộ, tô nao rai “dlai” hăng “ia rơsĭ” amra ngă giong djơ̆ rơnoh bruă, ngă gal brơi pơtrut pơđĭ kyar bơwih ƀong, tuai čuă ngui, ngă pơhư̆č tuh pơplai, djru tơlơi kiăng dŭ pơgiăng tañ, pơhlôm klă./.