Mrô tuai čuă ngui nao pơ tơring čar Dak Lak amăng hơdôm hrơi čơkă thun phrâo Ất Tỵ anai đĭ 1,3 wŏt pơhmu tui tơđar, ba glăi pơhrui giăm 60 klai prăk. Đơ đam tơring čar hơmâo čơkă 180 rơbâo čô tuai čuă ngui, đĭ 24% pơhmu tui tơđar, amăng anun 98% lĕ tuai amăng lŏn ia.

Hơdôm anih bơwih brơi tuai čuă ngui tui gru grua pơhưč lu mơnuih nao lăng. Anun lĕ sang djă pioh gơnam sô hơđăp Dak Lak, hơmâo čơkă 280 grup hăng hơdôm rơbâo čô mơnuih. Hơdôm anih tuai čuă ngui amăng đang glai, gru grua, anih ngui ngor, hyu ngui rôk ia krông čroh hnoh, drai ia ăt hơmâo lu tuai nao čuă lăng, ngui hrŏm lu tơlơi ngui gru grua, hơdôm tơlơi ngui mơ-ak, hyu čeo song nan, găn rơgao drai ia. Pơhlôm rơnuk rơnua brơi tuai, hơdôm anom bruă bơwih brơi tuai hơmâo prap lui klă rơdêh, mơnuih djru ba; pơpha mơnuih dŏ wai tơhrơi kah hăng mlă amăng hơdôm hrơi hlâo, amăng hrơi ƀong tết hăng tơdơi anun. Ngă tui khut khăt hơdôm tơlơi pơkă amăng bruă čih anăn, pơkă nua wĕ hăng nua bơwih brơi tuai; sĭ gơnam djơ̆ nua pơkă, pơhlôm agaih rơnăk jum dar.

Čơtlăm lơ 2/2, Jơnum min mơnuih ƀôn sang tơring čar Lâm Đồng pôr pơhing, tal Tết tui phiăn juăt Ất Tỵ anai, mrô tuai nao pơ̆ Lâm Đồng hyu čuă lăng, pơdơi pơdă đĭ giăm truh 36% bơhmu hăng thun hlâo. Đơ đam tơring čar čơkă năng ai ñu 380 rơbâo wot čô tuai hyu čuă lăng, pơdơi pơdă, đĭ giăm truh 36% bơhmu hăng Tết thun hlâo.

Amăng anun, tuai jar kơmar năng ai ñu 27 rơbâo wot čô tuai, đĭ 35%; tuai dô̆ glăi hmâo 270 rơbâo wot čô mơnuih, đĭ giăm truh 70% bơhmu hăng thun hlâo. Mrô tuai čuă ngui biă ñu amăng lơ 2 hăng lơ 4 Tết. Lăp đing nao, lơm tuai nao pơ̆ Lâm Đồng đĭ bơhmu hăng thun hlâo, samơ̆ tuai nao pơ̆ plơi prong Đà Lạt lĕ hrŏ trun. Plơi prong kơnong kơ čơkă rơbêh kơ 100 rơbâo wot čô tuai, hrŏ trun rơbêh kơ 33 wot čô tuai bơhmu hăng Tết tui phiăn juăt thun hlâo. Amăng tal Tết tui phiăn juăt 2025, khul apăn bruă tơring čar Lâm Đồng ngă hră pơsir bơtơhmal rơbêh kơ 1.000 čô mơnuih ngă soh tơlơi pơhlôm hơđong ƀơi jơlan nao rai./.